ഇടുക്കി - ഉപ്പുതറയിൽ ഓട്ടോറിക്ഷയും ബൈക്കും കൂട്ടിയിടിച്ച് യുവാവ് മരിച്ചു. ഉപ്പുതറ 9 ഏക്കർ കോളനി കുളത്തിൻ കാലായിൽ ശ്രീനിവാസന്റെ മകൻ അജിത്ത് ആണ് മരിച്ചത്. അപകടത്തിൽ നിരപ്പേക്കട പാലാ പറമ്പിൽ ജെഫിന് പരുക്കേറ്റു. ഇരുവരെയും കോട്ടയം മെഡിക്കൽ കോളേജിലേക്ക് കൊണ്ട് പോയെങ്കിലും അജിത്തിന്റെ ജീവൻ രക്ഷിക്കാനായില്ല.
ബുധനാഴ്ച രാത്രി പരപ്പ് ഉപ്പുതറ റൂട്ടിലായിരുന്നു അപകടം. ഉപ്പുതറയിൽ നിന്നും പരപ്പിലേക്ക് വരികയായിരുന്ന ഓട്ടോയും പരപ്പിൽ നിന്നും ഉപ്പുതറക്ക് വരികയായിരുന്ന ബൈക്കും തമ്മിലാണ് കൂട്ടിയിടിച്ചത്. ഇടിയുടെ ആഘാതത്തിൽ ബൈക്കിലിരുന്ന യുവാക്കൾ തെറിച്ച് 50 മീറ്റർ താഴ്ചയുള്ള കുഴിയിലേക്ക് പതിച്ചു.
