ജിദ്ദ - സൗദിയില്‍ സ്വകാര്യ മേഖലാ ജീവനക്കാരുടെ എണ്ണം സര്‍വകാല റെക്കോര്‍ഡില്‍. ജനുവരിയിലെ കണക്കുകള്‍ പ്രകാരം സ്വകാര്യ മേഖലയില്‍ 1,10,54,576 ജീവനക്കാരാണുള്ളത്. മാനവശേഷി, സാമൂഹിക വികസന മന്ത്രാലയ പദ്ധതികളും സ്വകാര്യ മേഖലാ വളര്‍ച്ചയും സാമ്പത്തിക പരിഷ്‌കാരങ്ങളും സര്‍ക്കാര്‍ പിന്തുണയും സ്വകാര്യ മേഖലാ ജീവനക്കാരുടെ എണ്ണം ഉയരാന്‍ ഇടയാക്കി.
ജനുവരിയിലെ കണക്കുകള്‍ പ്രകാരം സ്വകാര്യ മേഖലയില്‍ 23,27,858 സ്വദേശികള്‍ ജോലി ചെയ്യുന്നു. ഇക്കൂട്ടത്തില്‍ 13,75,478 പേര്‍ പുരുഷന്മാരും 9,52,380 പേര്‍ വനിതകളുമാണ്. സ്വകാര്യ മേഖലയില്‍ വിദേശ ജീവനക്കാര്‍ 87,26,718 ആണ്. ഇക്കൂട്ടത്തില്‍ 83,86,925 പേര്‍ പുരുഷന്മാരും 3,39,793 പേര്‍ വനിതകളുമാണ്. ജനുവരിയില്‍ സ്വകാര്യ മേഖലയില്‍ സൗദി ജീവനക്കാരുടെ എണ്ണത്തില്‍ 32,447 പേരുടെ വര്‍ധന രേഖപ്പെടുത്തി. ആദ്യമായാണ് സ്വകാര്യ മേഖലയില്‍ ഒരു മാസത്തിനിടെ സ്വദേശി ജീവനക്കാരുടെ എണ്ണത്തില്‍ ഇത്രയും വലിയ വര്‍ധന രേഖപ്പെടുത്തുന്നതെന്ന് നാഷണല്‍ ലേബര്‍ ഒബ്‌സര്‍വേറ്ററി പറഞ്ഞു.
