കൊച്ചി- കൊച്ചിയില്‍ റോഡ് ഷോയ്ക്ക് എത്തുന്ന പ്രധാനമന്ത്രി നരേന്ദ്ര മോദിക്കെതിരെ വിദ്യാര്‍ഥികള്‍ പ്രതിഷേധ മുദ്രാവാക്യമുയര്‍ത്തിയതിനെ തുടര്‍ന്ന് എറണാകുളം ലോ കോളേജിന് മുന്നില്‍ ബി ജെ പി പ്രവര്‍ത്തകരും പോലീസും തമ്മില്‍ സംഘര്‍ഷം. കെ എസ് യു പ്രവര്‍ത്തകര്‍ കോളേജിന് മുന്നില്‍ മോദിക്കെതിരെ ബാനറുയര്‍ത്തി പ്രതിഷേധിച്ചു. 'എ ബിഗ് നോ ടു മോദി' എന്നെഴുതിയ ബാനറാണ് സ്ഥാപിച്ചത്. ബി ജെ പി പ്രവര്‍ത്തകരുടെ പ്രതിഷേധത്തെ തുടര്‍ന്ന് ബാനര്‍ നീക്കം ചെയ്ത പോലീസ് രണ്ട് കെ എസ് യു പ്രവര്‍ത്തകരെ സ്ഥലത്തു നിന്ന് നീക്കി. ഇതിന് പിന്നാലെ ക്യാമ്പസിനുള്ളില്‍ നിന്ന് മോദി ഗോബാക്ക് മുദ്രാവാക്യമുയര്‍ന്നതോടെ പ്രകോപിതരായ ബി ജെ പി പ്രവര്‍ത്തകര്‍ ആക്രോശവുമായി കോളേജ് ഗേറ്റിലേക്ക് പാഞ്ഞടുക്കുകയായിരുന്നു. ആക്രമണോത്സുകരായി എത്തിയ ബി ജെ പി പ്രവര്‍ത്തകരെ പോലീസ് ബലമായി പിടിച്ചു മാറ്റി. മുതിര്‍ന്ന നേതാക്കളുടെ ഇടപെടലും അനിഷ്ട സംഭവങ്ങള്‍ ഒഴിവാക്കി.
