(മേപ്പയൂർ) കോഴിക്കോട് - മേപ്പയ്യൂരിൽ ഡി.വൈ.എഫ്.ഐ പ്രവർത്തകന് വെട്ടേറ്റു. മേപ്പയ്യൂർ എടത്തിൽ മുക്കിലെ നെല്ലിക്കാ താഴക്കുനി സുനിൽ കുമാറിനാണ് വെട്ടേറ്റത്. ഗുരുതര പരുക്കേറ്റ സുനിൽ കുമാറിനെ കോഴിക്കോട് ഗവൺമെന്റ് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
യൂത്ത് ലീഗ് പ്രവർത്തകരാണ് ആക്രമണത്തിനു പിന്നിലെന്ന് ഡി.വൈ.എഫ്.ഐ ആരോപിച്ചു. എടത്തിൽമുക്ക് ടൗണിൽ നിൽക്കുകയായിരുന്ന സുനിലിനെ ഇന്നോവ കാറിലെത്തിയ അൻസാർ, അജിനാസ് എന്നിവരുടെ നേതൃത്വത്തിലുള്ള എട്ടംഗ സംഘമാണ് വെട്ടിക്കൊല്ലാൻ ശ്രമിച്ചതെന്ന് ഡി.വൈ.എഫ്.ഐ ആരോപിച്ചു. പ്രാണരക്ഷാർത്ഥം കടയിൽ കയറി രക്ഷപ്പെടാൻ ശ്രമിച്ച സുനിലിനെ കടയിൽ നിന്നും വലിച്ചിറക്കി വെട്ടുകയായിരുന്നുവെന്നും ഇവർ പോലീസിനോട് പറഞ്ഞു. സംഭവത്തിൽ മേപ്പയൂർ ടൗണിൽ ഡി.വൈ.എഫ്.ഐ പ്രതിഷേധ പ്രകടനം നടത്തി.
ആക്രമണത്തിന്റെ സി.സി.ടി.വി ദൃശ്യങ്ങൾ പുറത്ത് വന്നിട്ടുണ്ട്. സംഭവത്തിൽ കേസെടുത്ത് അന്വേഷണം ആരംഭിച്ചതായി പോലീസ് പറഞ്ഞു.
