കൊച്ചി- ഗ്യാസ് സിലിണ്ടര്‍ മാറ്റുന്നതിനിടയില്‍ സിലിണ്ടര്‍ പൊട്ടിത്തെറിച്ച് വീട്ടമ്മക്ക് ഗുരുതരമായി പരിക്കേറ്റു. ഇടപ്പള്ളി നേതാജി റോഡില്‍ ഞാണയ്ക്കല്‍ വീട്ടില്‍ പരേതനായ ദേവസിയുടെ ഭാര്യ എല്‍സി ദേവസി(50)ക്കാണ് ഗുരുതരമായി പൊള്ളലേറ്റത്. ഇന്നലെ രാവിലെ ഭക്ഷണം പാകം ചെയ്യുന്നതിന് മുമ്പ് കാലിയായ ഗ്യാസ് സിലിണ്ടര്‍ മാറ്റി നിറ സിലിണ്ടര്‍ ഘടിപ്പിക്കുമ്പോള്‍ വളരെ ശക്തിയായി ഗ്യാസ് ലീക്ക് ചെയ്യുകയും സിലിണ്ടര്‍ പൊട്ടിത്തെറിക്കുകയുമായിരുന്നു.
വലിയ ശബ്ദത്തോടെയുള്ള പൊട്ടിത്തെറി കേട്ട് അയല്‍വാസികള്‍ ഓടിക്കൂടി ദേഹമാസകലം പൊള്ളലേറ്റ എല്‍സിയെ ഉടന്‍ ആശുപത്രിയിലെത്തിച്ചു. എറണാകുളം ജനറല്‍ ആശുപത്രിയില്‍ പ്രവേശിപ്പിച്ച വീട്ടമ്മയുടെ നില ഗുരുതരമായി തുടരുന്നു. വീട്ടില്‍ വേറെ ആരുമില്ലാത്ത സമയത്തായിരുന്നു അപകടം സംഭവിച്ചത്. വീട്ടിലെ ഉപകരണങ്ങള്‍ പൂര്‍ണമായും തീയില്‍ കത്തിയമര്‍ന്നു. തൃക്കാക്കരയില്‍ നിന്ന് അഗ്‌നിശമന സേന എത്തിയപ്പോഴേക്കും നാട്ടുകാര്‍ തീയണച്ചിരുന്നു. പി.ടി തോമസ് എംഎല്‍എ, ഡിവിഷന്‍ കൗണ്‍സിലര്‍ ജോസഫ് അലക്സ് തുടങ്ങിയവര്‍ ഉടന്‍ സ്ഥലത്തെത്തി.
രാവിലെ നടന്ന സംഭവത്തില്‍ ഉച്ച കഴിഞ്ഞ് രണ്ട് മണി വരെ ഗ്യാസ് ഏജന്‍സിയുടെ ഓഫീസില്‍ നിന്നോ, ഇന്ത്യന്‍ ഓയില്‍ കോര്‍പ്പറേഷന്റെ ഓഫീസില്‍ നിന്നോ ആരും ബന്ധപ്പെട്ടില്ലെന്ന് പി.ടി തോമസ് എം.എല്‍.എ പറഞ്ഞു. ഇത്തരം അപകടങ്ങള്‍ ആവര്‍ത്തിക്കുന്ന സാഹചര്യത്തില്‍ തൃക്കാക്കര നിയോജക മണ്ഡലത്തിലെ ഗ്യാസ് വിതരണ ഏജന്‍സികളുടേയും ഉപയോക്താക്കളുടേയും അദാലത്ത് ഉടന്‍ സംഘടിപ്പിക്കുമെന്നും പി.ടി.തോമസ് പറഞ്ഞു.
