തൃശൂര്‍ - നവകേരള സദസിന്റെ പരിപാടിയില്‍ മുഖ്യമന്ത്രി പിണറായി വിജയനെ കൈയടിച്ച് സ്വീകരിക്കണമെന്ന് അവതാരക. എന്നാല്‍ അവതാരകയെ മുഖ്യമന്ത്രി തിരുത്തി. അവതാരക പറഞ്ഞ് കൈയ്യടിപ്പിക്കേണ്ടെന്ന് മുഖ്യമന്ത്രി പറഞ്ഞു. തൃശൂരിലായിരുന്നു സംഭവം.
നവ കേരള സദസ്സ് നടക്കുന്നതിനിടയില്‍ മുഖ്യമന്ത്രിക്ക് സമീപത്തേക്ക് ചെല്ലാന്‍ ശ്രമിച്ചയാളെ പോലീസ് കസ്റ്റഡിയിലെടുത്തു. വടക്കാഞ്ചേരി മണ്ഡലത്തില്‍ നവ കേരള സദസ്സ് നടക്കുമ്പോള്‍ ആയിരുന്നു സംഭവം നടന്നത്. പരാതി പറയാനായി മുഖ്യമന്ത്രിക്ക് അടുത്തേക്ക് ചെല്ലാന്‍ ശ്രമിച്ച യുവാവിനെയാണ് പോലീസ് കസ്റ്റഡിയില്‍ എടുത്തത്.
ആര്യമ്പാട് സ്വദേശി റഫീഖ് ആണ് പിടിയിലായത്. മുഖ്യമന്തി പ്രസംഗം അവസാനിപ്പിച്ചതിനു പിന്നാലെയായിരുന്നു സംഭവം. യുവാവ് സ്‌റ്റേജിലേക്ക് ഓടിക്കയറാന്‍ ശ്രമിക്കുകയായിരുന്നു. ഉടന്‍ തന്നെ പോലീസ് ഇയാളെ തടഞ്ഞു സ്ഥലത്തു നിന്നു നീക്കി. പിന്നീട് കസ്റ്റഡിയിലെടുത്തു.
