ദുബായ്- ഗാസയില്‍ ഇസ്രായില്‍ തുടരുന്ന യുദ്ധത്തില്‍ രോഷം പ്രകടിപ്പിച്ചും വെടിനിര്‍ത്തല്‍ ആവശ്യപ്പെട്ടും ദുബായില്‍ യു.എന്‍ കാലാസ്ഥാ ഉച്ചകോടിക്കിടെ പ്രതിഷേധ ധര്‍ണ. യു.എന്‍ ഉച്ചോകടി നടന്ന അല്‍ വാസല്‍ ഡോമിന് സമീപമാണ് സ്വതന്ത്ര ഫലസ്തീന്‍ മുദ്രാാവാക്യങ്ങള്‍ മുഴക്കി ഇസ്രായേല്‍-ഹമാസ് യുദ്ധത്തിനെതിരെ കാലാവസ്ഥാ പ്രവര്‍ത്തകര്‍ കുത്തിയിരുന്ന് പ്രതിഷേധിച്ചത്.
മിഡില്‍ ഈസ്റ്റ് സംഘര്‍ഷമായാലും കാലാവസ്ഥാ വ്യതിയാനമായാലും കര്‍ശനമായ മാര്‍ഗ്ഗനിര്‍ദ്ദേശങ്ങള്‍ പാലിച്ചുകൊണ്ട് സമാധാനപരമായ പ്രതിഷേധം നടത്താന്‍ യു.എ.ഇ അനുവദിക്കുകയായിരുന്നു.
ഗാസയില്‍ തുടരുന്ന ആക്രമണം അവസാനിപ്പിക്കണമെന്ന ആഹ്വാനവുമായാണ് ഞായറാഴ്ച നൂറോളം പേര്‍ ഒത്തുകൂടിയത്.
ഗാസയില്‍ രാത്രിയിലും കുട്ടികളുടെ നിലവിളി മുഴങ്ങുകയാണെന്ന് പ്രകടനത്തില്‍ പങ്കെടുത്ത ഒരാള്‍ തടിച്ചുകൂടിയ ജനക്കൂട്ടത്തെ അഭിസംബോധന ചെയ്തുകൊണ്ട് പറഞ്ഞു.
ഫലസ്തീന്‍ പതാകകളും വെടിനിര്‍ത്തലും കാലാവസ്ഥാ നീതിയും ആവശ്യപ്പെടുന്ന വിവിധ പ്ലക്കാര്‍ഡുകളും പ്രതിഷേധ സ്ഥലത്ത് പ്രദര്‍ശിപ്പിച്ചിരുന്നു.
ഇസ്രായില്‍ സേനയുടെ ആക്രമണത്തില്‍ കൊല്ലപ്പെട്ട നൂറുകണക്കിന് ആളുകളുടെ പേരുകളും പ്രവര്‍ത്തകര്‍ വായിച്ചു. നിരവധി കാഴ്ചക്കാരും ആക്ടിവിസ്റ്റുകളും പേരുകളുടെ അനന്തമായി തോന്നുന്ന ലിസ്റ്റ് വായിച്ചു.
ഈ പ്രതിഷേധങ്ങള്‍ ഫലപ്രദമാകുമെന്ന് സമ്മേളനത്തിനെത്തിയ ഓസ്‌ട്രേലിയന്‍ കാലാവസ്ഥാ നീതി പ്രവര്‍ത്തകന്‍ മൈക്കല്‍ പോളണ്ട് പറഞ്ഞു. യുദ്ധം ആരംഭിച്ചതിന് ശേഷം ലോകനേതാക്കളില്‍ ഭൂരിഭാഗവും ഒത്തുകൂടിയ ആദ്യത്തെ പ്രധാന സമ്മേളനമാണിത്.
