അബുദാബി- അബുദാബി നഗരത്തിനും അല്‍ ദഫ്രയിലെ അല്‍ ദന്നയ്ക്കും ഇടയില്‍ റെയില്‍വേ സര്‍വീസുകള്‍ സ്ഥാപിക്കുമെന്ന് യു.എ.ഇ പ്രഖ്യാപിച്ചു. യു.എ.ഇ നാഷണല്‍ റെയില്‍ നെറ്റ്വര്‍ക്കിന്റെ ഡെവലപ്പറും ഓപ്പറേറ്ററുമായ ഇത്തിഹാദ് റെയിലും അബുദാബി നാഷണല്‍ ഓയില്‍ കമ്പനിയും (അഡ്നോക്) തമ്മില്‍ ഇതു സംബന്ധിച്ച കരാര്‍ ഒപ്പുവച്ചു.
അബുദാബിയില്‍നിന്ന് 250 കിലോമീറ്റര്‍ പടിഞ്ഞാറായി സ്ഥിതി ചെയ്യുന്ന അല്‍ ദന്നയില്‍ 29,000 പേര്‍ താമസിക്കുന്നുണ്ട്. 1970-കളില്‍ അഡ്നോക്കിലെ വ്യാവസായിക ജീവനക്കാരെ പാര്‍പ്പിക്കാനുള്ള സ്ഥലമായി മാറിയതോടെയാണ് ഈ ഗ്രാമീണ മരുഭൂമി നഗരമായി മാറാന്‍ തുടങ്ങിയത്.
അഡ്നോക് ജീവനക്കാര്‍ക്ക് ഭാവിയില്‍ തലസ്ഥാന നഗരത്തിനും അല്‍ ദന്നയ്ക്കും ഇടയില്‍ ട്രെയിനില്‍ യാത്ര ചെയ്യാന്‍ കഴിയും.
ലോകോത്തര യാത്രാനുഭവങ്ങള്‍ നല്‍കാനുള്ള ഇത്തിഹാദ് റെയിലിന്റെ കാഴ്ചപ്പാടാണ് ഈ പങ്കാളിത്തം കാണിക്കുന്നതെന്ന് പ്രസിഡന്‍ഷ്യല്‍ കോടതിയിലെ ഓഫീസ് ഓഫ് ഡെവലപ്മെന്റ് ചെയര്‍മാന്‍ ഷെയ്ഖ് തിയാബ് ബിന്‍ മുഹമ്മദ് ബിന്‍ സായിദ് അല്‍ നഹ്യാന്‍ പറഞ്ഞു.
