തിരുവനന്തപുരം - അധ്യാപകർക്കുള്ള ക്ലസ്റ്റർ പരിശീലനം നടക്കുന്ന ഒൻപത് ജില്ലകളിലെ ഒന്നു മുതൽ പത്തുവരെ ക്ലാസുകൾക്ക് വ്യാഴാഴ്ച അവധി പ്രഖ്യാപിച്ചു. തിരുവനന്തപുരം, പത്തനംതിട്ട, ആലപ്പുഴ, തൃശൂർ, കോഴിക്കോട്, കണ്ണൂർ, കാസർകോട്, മലപ്പുറം, ഇടുക്കി ജില്ലകളിലും പാലക്കാട് ജില്ലയിലെ മണ്ണാർക്കാട്, ചെർപ്പുളശ്ശേരി ഉപജില്ലകളിലുമാണ് അവധി പ്രഖ്യാച്ചത്.
എന്നാൽ, കൊല്ലം, കോട്ടയം, എറണാകുളം, വയനാട് ജില്ലകളിലും പാലക്കാട് ജില്ലയിലെ മണ്ണാർക്കാട്, ചെർപ്പുളശ്ശേരി ഒഴികെയുള്ള ഉപജില്ലകളിലും പ്രവൃത്തിദിനമായിരിക്കും.
ജില്ല സ്‌കൂൾ കലോത്സവങ്ങൾ നടക്കുന്നതിനാൽ വയനാട് 24നും പാലക്കാട് ജില്ലയിലെ മണ്ണാർക്കാട്, ചെർപ്പുളശ്ശേരി ഒഴികെ ഉപജില്ലകളിൽ 27നും എറണാകുളത്തും കൊല്ലത്തും 28നും കോട്ടയത്ത് 29നുമാണ് ക്ലസ്റ്റർ പരിശീലനം. പരിശീലനം നടക്കുന്ന ദിവസങ്ങളിൽ ഇവിടെ സ്‌കൂളുകൾക്ക് അവധിയായിരിക്കും.
ഏതെങ്കിലും ജില്ലകളിൽ വ്യാഴാഴ്ച ഉപജില്ല കലോത്സവങ്ങൾ നടക്കുന്നുണ്ടെങ്കിൽ ആ ഉപജില്ലകളിൽ ക്ലസ്റ്റർ യോഗം മറ്റൊരു ദിവസത്തേക്ക് മാറ്റിവെക്കാൻ അതാത് വിദ്യാഭ്യാസ ഉപഡയറക്ടർമാരെ ചുമതലപ്പെടുത്തിയതായും പൊതുവിദ്യാഭ്യാസ ഡയറക്ടർ വ്യക്തമാക്കി.
