(പരപ്പനങ്ങാടി) മലപ്പുറം -മലപ്പുറത്ത് സി.പി.എം നേതാവിനെതിരെ പോക്‌സോ കേസ്. സി.പി.എം മലപ്പുറം ജില്ലാ കമ്മിറ്റി അംഗവും മുൻ ജില്ലാ സെക്രട്ടേറിയറ്റ് അംഗവുമായ വേലായുധൻ വള്ളിക്കുന്നിനെതിരെയാണ് കേസെടുത്തത്. പരപ്പനങ്ങാടി പോലീസാണ് കേസ് രജിസ്റ്റർ ചെയ്തത്. ബസ് യാത്രക്കിടെ പ്രായപൂർത്തിയാകാത്ത ആൺകുട്ടിയുടെ സ്വകാര്യ ഭാഗങ്ങളിൽ സ്പർശിച്ചുവെന്നാണ് പരാതിയെന്ന് പോലീസ് പറഞ്ഞു. സംഭവം കോഴിക്കോട് നല്ലളം സ്‌റ്റേഷൻ പരിധിയിൽ വെച്ചായതിനാൽ കൂടുതൽ അന്വേഷണങ്ങൾക്കായി കേസ് ഉടനെ നല്ലളം പോലീസിന് കൈമാറുമെന്ന് പരപ്പനങ്ങാടി പോലീസ് പറഞ്ഞു. പ്രതി പട്ടികജാതി ക്ഷേമ ബോർഡ് മുൻ അംഗം കൂടിയാണ്.
