മനാമ-ഇസ്രായിലുമായുള്ള സാമ്പത്തിക ബന്ധം ബഹ്റൈൻ താൽക്കാലികമായി വിഛേദിച്ചു. ഇസ്രായേലിലെ സ്ഥാനപതിയെ തിരിച്ചുവിളിച്ചിട്ടുമുണ്ട്. ബഹ്‌റൈനിലെ ഇസ്രായിൽ അംബാസഡർ രാജ്യം വിട്ടതായും ബഹ്റൈൻ പാർലമെന്റ് സ്ഥിരീകരിച്ചു.
അന്താരാഷ്ട്ര നിയമങ്ങൾ ലംഘിച്ച് ഇസ്രായിൽ ഗാസയിലെ നിരപരാധികളും സാധാരണക്കാരുമായ ജനങ്ങൾക്കുനേരെ തുടരുന്ന സൈനിക നടപടിയിൽ പ്രതിഷേധിച്ചാണ് നടപടി. ഫലസ്‌തീനിയൻ ജനതയുടെ നിയമാനുസൃതമായ അവകാശങ്ങളെ പിന്തുണയ്‌ക്കുന്ന നിലപാടാണ് ബഹ്റൈൻ സ്വീകരിച്ചിട്ടുള്ളതെന്നും പാർലമെന്റ് ഇൻസ്റ്റഗ്രാം പോസ്റ്റിൽ പറഞ്ഞു. അബ്രഹാം കരാറിന്റെ ഭാഗമായി 2020-ലാണ് ബഹ്റൈൻ ഇസ്രായേലുമായി ഔദ്യോഗികമായി ബന്ധം സ്ഥാപിച്ചത്.
ഇസ്രായിൽ സൈനിക നടപടി തുടുരുന്ന സാഹചര്യത്തിൽ ഗാസയിലെ നിരപരാധികളായ ജനതയുടെ ജീവൻ സംരക്ഷിക്കാനായി കൂടുതൽ തീരുമാനങ്ങളും നടപടികളും ആവശ്യപ്പെടുമെന്നും പാർലമെന്റ് വ്യക്തമാക്കി.
