വടകര- രാവിലെ ജയില്‍ ചാടിയ കളവ് കേസിലെ പ്രതിയെ വൈകിട്ട് പിടികൂടി ജയിലിലെത്തിച്ചു. കൊയിലാണ്ടി സബ് ജയിലില്‍നിന്നാണ് താമരശേരി സ്വദേശി തച്ചംപൊയില്‍ അനസ് (24) രാവിലെ 8 മണിയോടെ ജയില്‍ ചാടിയത്. സ്വകാര്യ ആശുപത്രിയില്‍നിന്ന് ചെമ്പുകമ്പി മോഷ്ടിച്ചെന്ന കേസിലാണ് ബാലുശേരി പോലീസ് അറസ്റ്റ് ചെയ്ത് കോടതിയില്‍ ഹാജരാക്കി റിമാന്റ് ചെയ്തത്. മതില്‍ ചാടി കടന്നാണ് ജയിലിന് പുറത്തെത്തിയത്. രാവിലെ മുതല്‍ പോലീസും ജയില്‍ അധികൃതരും വ്യാപക തെരച്ചില്‍ ആരംഭിച്ചിരുന്നു. വൈകിട്ട് സ്വദേശമായ പൂനൂരില്‍ വെച്ചാണ് ജയില്‍ ഉദ്യോഗസ്ഥര്‍ പിടികൂടിയത്.
