പാലക്കാട്- എ.വി. ഗോപിനാഥിനു പിറകേ കോൺഗ്രസ് നേതൃത്വത്തിനെതിരേ മുൻ എം.എൽ.എ സി.പി. മുഹമ്മദും രംഗത്തെത്തി, ജില്ലയിൽ കോൺഗ്രസ് രാഷ്ട്രീയം കലങ്ങി മറയുകയാണ്. രണ്ടു വർഷം മുമ്പ് കോൺഗ്രസിൽ നിന്ന് രാജിവെച്ച മുതിർന്ന നേതാവ് എ.വി. ഗോപിനാഥ് സി.പി.എമ്മിനൊപ്പം ചേരുമെന്ന അഭ്യൂഹം പരക്കുന്നതിനിടയിലാണ് അദ്ദേഹത്തിന്റെ അടുത്ത സുഹൃത്തും ജില്ലയിലെ മറ്റൊരു പ്രധാന നേതാവുമായ മുൻ പട്ടാമ്പി എം.എൽ.എ പരസ്യപ്രസ്താവനയുമായി രംഗത്തെത്തിയിരിക്കുന്നത്. മുൻ പ്രതിപക്ഷനേതാവ് രമേശ് ചെന്നിത്തലക്കെതിരേ ആഞ്ഞടിച്ചു കൊണ്ട് സി.പി. മുഹമ്മദ് നടത്തിയ പരാമർശം കോൺഗ്രസ് നേതാക്കൾ അമ്പരപ്പോടും സി.പി.എം നേതൃത്വം കൗതുകത്തോടും നോക്കിക്കാണുകയാണ്.
അടുത്ത കാലത്ത് അന്തരിച്ച മുൻ ഡി.സി.സി വൈസ് പ്രസിഡന്റും പട്ടാമ്പി നഗരസഭയുടെ ആദ്യ ചെയർമാനുമായ കെ.എസ്.ബി.എ തങ്ങളുടെ പരാതിയുമായി ബന്ധപ്പെട്ട വിവാദങ്ങളാണ് സി.പി. മുഹമ്മദിനെ ചൊടിപ്പിച്ചത്. കഴിഞ്ഞ നിയമസഭാ തെരഞ്ഞെടുപ്പിൽ പട്ടാമ്പിയിലെ യു.ഡി.എഫ് സ്ഥാനാർഥിയായി കെ.എസ്.ബി.എ തങ്ങളുടെ പേര് അവസാനനിമിഷം വരെ പരിഗണിക്കപ്പെട്ടിരുന്നു. പക്ഷേ റിയാസ് മുക്കോളിക്ക് വേണ്ടി വഴി മാറിക്കൊടുക്കേണ്ടി വന്നു. സി.പി. മുഹമ്മദും ഷാഫി പറമ്പിൽ എം.എൽ.എയും ചേർന്നാണ് തന്റെ സ്ഥാനാർഥിത്വം ഇല്ലാതാക്കിയത് എന്ന് അവസാനം വരെ വിശ്വസിച്ച കെ.എസ്.ബി.എ തങ്ങൾ ഇരു നേതാക്കൾക്കുമെതിരേ പല തവണ പ്രതിഷേധം രേഖപ്പെടുത്തിയിരുന്നു. മരണസമയത്തും അത് ചർച്ചയായി. തന്നെ അനാവശ്യമായി വിവാദത്തിലേക്ക് വലിച്ചിഴച്ചതാണ് എന്നാണ് സി.പി. മുഹമ്മദിന്റെ പരാതി. കഴിഞ്ഞയാഴ്ച പട്ടാമ്പിയിൽ നടന്ന കെ.എസ്.ബി.എ തങ്ങൾ അനുസ്മരണസമ്മേളനത്തിലേക്ക് മുതിർന്ന നേതാവിന് ക്ഷണമുണ്ടായിരുന്നില്ല. രമേശ് ചെന്നിത്തലയായിരുന്നു യോഗത്തിന്റെ ഉദ്ഘാടകൻ. ഒരു വിഭാഗം നേതാക്കൾ തന്നെ സംശയത്തിന്റെ നിഴലിൽ നിർത്തുകയാണെന്ന പരാതി മുൻ എം.എൽ.എക്കുണ്ട്. കഴിഞ്ഞ ദിവസം പട്ടാമ്പിയിൽ നടന്ന ഒരു പൊതുചടങ്ങിലാണ് സി.പി. മുഹമ്മദ,് രമേശ് ചെന്നിത്തലക്കെതിരേ ആഞ്ഞടിച്ചത്. കെ.എസ്.ബി.എ തങ്ങളുടെ സ്ഥാനാർഥിത്വത്തിന് പാര വെച്ച നേതാവ് തന്നെ അനുസ്മരണസമ്മേളനം ഉദ്ഘാടനം ചെയ്തുവെന്ന സി.പി. മുഹമ്മദിന്റെ പരാമർശം കോൺഗ്രസിൽ വലിയ ചർച്ചയായി മാറിയിട്ടുണ്ട്. താൻ കോൺഗ്രസ് വിടുകയാണെന്ന സൂചനയൊന്നും സി.പി. മുഹമ്മദിന്റെ ഭാഗത്ത് നിന്ന് ഉണ്ടായിട്ടില്ലെങ്കിലും എ.വി. ഗോപിനാഥിന്റെ നീക്കങ്ങളുമായി പുതിയ വിവാദത്തിന് ബന്ധമുണ്ടോ എന്ന സംശയം പല കോണുകളിൽ നിന്നും ഉയർന്നു കഴിഞ്ഞു. അടുത്ത സുഹൃത്തുക്കളാണ് ഇരുവരും.
