തിരുവനന്തപുരം - തുടര്‍ഭരണത്തിന്റെ തണലില്‍ സമ്മര്‍ദ്ദം ചെലുത്തി പണം പിരിക്കുന്നുണ്ടെന്നും ഇതേപ്പറ്റി ഇപ്പോഴും പരാതികള്‍ ഉയരുന്നുണ്ടെന്നും സി പി എമ്മില്‍ സ്വയം വിമര്‍ശം. സി പി എം സംസ്ഥാന കമ്മിറ്റി അംഗീകരിച്ച അവലോകന റിപ്പോര്‍ട്ടിലാണ് ഇത് തെറ്റായ പ്രവണതയാണെന്ന് ചൂണ്ടിക്കാട്ടിയിട്ടുള്ളത്. നേതാക്കള്‍ സ്വയം അധികാര കേന്ദ്രങ്ങള്‍ ആകരുതെന്ന താക്കീതും രേഖയിലുണ്ട്. ഈ പ്രവണത പൂര്‍ണമായും സര്‍ക്കാരിന്റെ ദൈനംദിന പ്രവര്‍ത്തനത്തില്‍ പാര്‍ട്ടി ഇടപെടരുതെന്ന് നേരത്തെ അംഗീകരിച്ച രേഖയില്‍ കീഴ് ഘടകങ്ങളോട് ആവശ്യപ്പെട്ടിരുന്നെങ്കിലും അത് നടപ്പാകുന്നില്ല. സര്‍ക്കാരിന്റെ ദൈനംദിന കാര്യങ്ങളില്‍ ഇടപെടരുതെന്ന നിര്‍ദ്ദേശം പാലിക്കുന്നതില്‍ കൂടുതല്‍ ശ്രദ്ധിക്കണമെന്നാണ് രേഖയിലെ പരാമര്‍ശം. സഹകരണ സ്ഥാപനങ്ങളുമായി ചേര്‍ന്ന് തദ്ദേശസ്ഥാപനങ്ങള്‍ പ്രാദേശിക വികസന പദ്ധതികള്‍ നടപ്പാക്കണമെന്ന മുന്‍ നിര്‍ദ്ദേശം പാലിക്കപ്പെട്ടില്ലെന്ന കുറ്റപ്പെടുത്തലും രേഖയിലുണ്ട്. ഇക്കാര്യത്തില്‍ പാര്‍ട്ടി ഘടകങ്ങള്‍ ഗുരുതരമായ അലംഭാവമാണ് കാട്ടുന്നത് എന്നാണ് കുറ്റപ്പെടുത്തല്‍. ജില്ലാ കമ്മിറ്റികളോട് അഭിപ്രായം ചോദിക്കുമ്പോള്‍ വേഗത്തില്‍ മറുപടി ഉണ്ടാകുന്നില്ലെന്നും അവലോകന റിപ്പോര്‍ട്ടില്‍ പറയുന്നു.
