ന്യൂദല്‍ഹി - ദേവികുളം നിയമസഭാ തെരഞ്ഞെടുപ്പ് കേസ് സുപ്രീം കോടതി ഇന്ന് വീണ്ടും പരിഗണിക്കും. തെരഞ്ഞെടുപ്പ് റദ്ദാക്കിയ കേരള ഹൈക്കോടതി വിധിക്കെതിരെ എം എല്‍ എ ആയി തെരഞ്ഞടുക്കപ്പെട്ടിരുന്ന സി പി എമ്മിലെ എ രാജയുടെ അപ്പീലാണ് കോടതി പരിഗണിക്കുക. ജസ്റ്റിസ് അനിരുദ്ധ ബോസ് അധ്യക്ഷനായ ബെഞ്ചാകും ഹര്‍ജി പരിഗണിക്കുക. കേസില്‍ ഹൈക്കോടതി വിധി സുപ്രീം കോടതി നേരത്തെ തന്നെ സ്റ്റേ ചെയ്തിരുന്നു. കേസുമായി ബന്ധപ്പെട്ട എല്ലാ രേഖകളുടെയും ഒറിജിനല്‍ കൈമാറാന്‍ ഹൈക്കോടതിക്ക് സുപ്രീം കോടതി നിര്‍ദേശം നല്‍കിയിരുന്നു. എന്നാല്‍ സുപ്രധാനരേഖകള്‍ കൈമാറായില്ലെന്ന് എതിര്‍ സ്ഥാനാര്‍ത്ഥിയായിരുന്ന യു ഡി എഫിലെ ഡി കുമാറിന്റെ അഭിഭാഷകന്‍ ആരോപിച്ചു. ഇക്കാര്യം ചൂണ്ടിക്കാട്ടി ഡി കുമാര്‍ പുതിയ അപേക്ഷയും നല്‍കിയിരുന്നു. എന്നാല്‍ എല്ലാ രേഖകളും സുപ്രീം കോടതിയില്‍ എത്തിയിട്ടുണ്ടെന്നാണ് ഓഫീസ് ഓര്‍ഡറിലുള്ളതെന്ന് എ രാജയുടെ അഭിഭാഷകന്‍ കോടതിയില്‍ പറഞ്ഞിരുന്നു. കേസ് ഇന്ന് വീണ്ടും കോടതി പരിഗണിക്കുമ്പോള്‍ ഈ വിവരം രജിസ്ട്രി കോടതിയെ അറിയിക്കും.
