ആലുവ- പ്രശസ്ത മലയാള ഗസല്‍ ഗായകന്‍ ഉമ്പായി (68) അന്തരിച്ചു. കരളിനെ ബാധിച്ച അര്‍ബുദത്തെ തുടര്‍ന്ന് ചികിത്സയിലായിരുന്ന ഉമ്പായി ബുധനാഴ്ച വൈകുന്നേരം 4.45ഓടെയാണ് ആലുവയിലെ അന്‍വര്‍ പാലിയേറ്റീവ് കെയര്‍ ആശുപത്രിയില്‍ വച്ച് അന്ത്യശ്വാസം വലിച്ചത്. പി.എ. ഇബ്രാഹിം എന്നാണ് യഥാര്‍ത്ഥ പേര്. കവി ഒ.എന്‍.വി കുറുപ്പിന്റേയും സച്ചിദാനന്ദന്റേയും വരികളെ തനത് ഈണത്തില്‍ മലയാള ഗസലുകളാക്കി മാറ്റിയ ഉമ്പായിയുടെ ശബ്ദം മലയാളത്തില്‍ വേറിട്ട അനുഭവമാണ്. പഴയ ചലചിത്ര ഗാനങ്ങളും നിരവധി ഉര്‍ദു ഗസലുകളും പുനരാവിഷ്‌ക്കരിച്ചിട്ടുണ്ട്. നിരവധി ഗസല്‍ ആല്‍ബങ്ങള്‍ ഉമ്പായിയുടേതായി ഉണ്ട്. പാടുക സൈഗാല്‍ പാടൂ, അകലെ മൗനം പോല്‍, ഒരിക്കല്‍ നീ പറഞ്ഞു തുടങ്ങിയവയാണ് ശ്രദ്ധേയമായ ആല്‍ബങ്ങള്‍. സംഗീത സംവിധാനയകന്‍ എം. ജയചന്ദ്രനൊപ്പം നോവല്‍ എന്ന സിനിമയ്ക്ക് സംഗീത സംവിധാനവും നിര്‍വഹിച്ചിട്ടുണ്ട്.
