കോഴിക്കോട് - ഭര്‍ത്താവ് കൊലപ്പെടുത്താന്‍ ശ്രമിച്ചെന്ന് ഭാര്യയുടെ പരാതി അന്വേഷിക്കാന്‍ പോയ പൊലീസ് സംഘത്തിന് നേരെ ഭര്‍ത്താവിന്റെ ആക്രമണം. പോലീസ് വാഹനവും ഇയാള്‍ കേടു വരുത്തി. പരുക്കേറ്റ കൊയിലാണ്ടി സ്റ്റേഷനിലെ എ എസ ്ഐ വിനോദിനെ ആശുപത്രിയില്‍ പ്രവേശിപ്പിച്ചു. തന്നെ കൊലപ്പെടുത്താന്‍ ശ്രമിച്ചെന്ന ഭാര്യയുടെ പരാതി അന്വേഷിക്കാന്‍ ചെന്നപ്പോഴായിരുന്നു ആക്രമണം. സംഭവത്തില്‍ കാപ്പാട് സ്വദേശി റൗഫിനെ പൊലീസ് അറസ്റ്റ് ചെയ്തു. കേസ് അന്വേഷണത്തിനായി പൊലീസുകാര്‍ വീട്ടിലെത്തിയപ്പോള്‍ റൗഫ് കമ്പിവടി കൊണ്ട് എ എസ്ഐ വിനോദിന്റെ തലയ്ക്കടിക്കുകയായിരുന്നു. പിന്നീട് കൂടുതല്‍ പൊലീസുകാര്‍ സ്ഥലത്തെത്തി റൗഫിനെ കീഴ്പ്പെടുത്തുകയുമായിരുന്നു. ഇയാള്‍ നിരവധി കേസുകളിലെ പ്രതിയാണെന്ന് പൊലീസ് പറഞ്ഞു. ഒരു കേസില്‍ ജയില്‍ ശിക്ഷ കഴിഞ്ഞ് പുറത്തിറങ്ങി വീട്ടിലെത്തിയപ്പോഴാണ് ഭാര്യയെ കൊലപ്പെടുത്താന്‍ ശ്രമിച്ചത്.
