തിരുവനന്തപുരം - സത്യജിത് റായ് ഫിലിം ഇന്‍സ്റ്റിറ്റ്യൂട്ട് അധ്യക്ഷ സ്ഥാനത്തേക്ക് സുരേഷ് ഗോപിയെ പരിഗണിച്ചതിനെപ്പറ്റി ഒന്നും അറിഞ്ഞിരുന്നില്ലെന്ന് ബി ജെ പി സംസ്ഥാന നേതൃത്വം. പാര്‍ട്ടി കേരള ഘടകം സുരേഷ് ഗോപിക്ക് എതിരാണെന്ന പ്രചാരണം ശരിയല്ലെന്നും തൃശൂരിലെ അദ്ദേഹത്തിന്റെ പദയാത്ര ഉദ്ഘാടനം ചെയ്യുന്നത് സംസ്ഥാന പ്രസിഡണ്ട് കെ സുരേന്ദ്രനാണെന്നും ബി ജെ പി നേതാക്കള്‍ പറയുന്നു. സത്യജിത് റായ് ഇന്‍സ്റ്റിറ്റ്യൂട്ട് അധ്യക്ഷ പദവി സംസ്ഥാന നേതാക്കളുമായി കൂടിയാലോചിച്ച് തീരുമാനിക്കുന്നതല്ല. കേന്ദ്രമെടുക്കുന്ന തീരുമാനമാണ്. അതുകൊണ്ട് തന്നെ സംസ്ഥാന നേതൃത്വത്തിന് തീരുമാനത്തില്‍ പങ്കില്ല. സുരേഷ് ഗോപിയും സംസ്ഥാന നേതൃത്വവും രണ്ടു വഴിക്കാണെന്നും സുരേഷ് ഗോപിയെ ഒതുക്കാനുള്ള തീരുമാനമാണ് ഇതെന്നുമുള്ള പ്രചാരങ്ങള്‍ക്ക് അടിസ്ഥാനമില്ലെന്നും നേതാക്കള്‍ പറയുന്നു.
