കൊച്ചി- മഹാരാജാസ് കോളേജിൽ എസ്.എഫ്.ഐ നേതാവ് അഭിമന്യൂവിനെ കൊലപ്പെടുത്തിയ കേസിലെ മുഖ്യപ്രതികളിൽ ഒരാൾ കൂടി പിടിയിൽ. കണ്ണൂർ സ്വദേശിയും കൊച്ചിയിൽ എൽ.എൽ.ബി വിദ്യാർഥിയുമായ മുഹമ്മദ് റിഫയാണ് പിടിയിലായത്. അഭിമന്യൂവിനെ അക്രമിച്ച സംഘത്തെ ക്യാംപസിലേക്ക് വിളിച്ചുവരുത്തിയത് റിഫയായിരുന്നു. കൃത്യത്തിന് ശേഷം മുങ്ങിയ ഇയാളെ ബംഗളൂരുവിൽനിന്നാണ് പിടികൂടിയത്. പ്രതികളെ സഹായിച്ച ഫസലുദ്ദീൻ എറണാകുളം കോടതിയിൽ കീഴടങ്ങിയിരുന്നു.
അഭിമന്യുവിനെ കൊലപ്പെടുത്തിയ സംഘത്തിലുണ്ടായിരുന്ന പള്ളുരുത്തി സ്വദേശി സനീഷിനെ ഇന്നലെ പോലീസ് പിടികൂടിയിരുന്നു. സംഭവദിവസം വിദ്യാർഥികളെ അക്രമിക്കാനെത്തിയ സംഘത്തെ നയിച്ചത് സനീഷായിരുന്നു. കേസിൽ നേരത്തെ അറസ്റ്റിലായ റിയാസിനെ സ്വന്തം വാഹനത്തിൽ ക്യാംപസിൽ എത്തിച്ചതും സനീഷായിരുന്നു. കൊലപാതകത്തിന്റെ മുഖ്യസൂത്രധാരകരിൽ ഒരാളാണ് സനീഷ്.
