തിരുവനന്തപുരം - ഓണക്കിറ്റ് വിതരണത്തിനുള്ള സമയപരിധി തിരുവോണത്തിന്റെ തലേദിവസമായ ഇന്ന് അവസാനിക്കാനിരിക്കേ പകുതിയിലേറെ പേര്‍ക്കും ഇനിയും ഓണക്കിറ്റ് ലഭിച്ചില്ല. എന്നാല്‍ ഇന്ന് തന്നെ കിറ്റുകളുടെ വിതരണം പൂര്‍ത്തിയാക്കി ആക്ഷേപങ്ങള്‍ ഒഴിവാക്കാനാണ് സര്‍ക്കാറിന്റെ ശ്രമം, ഓണക്കിറ്റ് വിതരണത്തിനായി റേഷന്‍ കടകള്‍ ഇന്ന് രാവിലെ 8 മണിമുതല്‍ രാത്രി 8 മണിവരെ ഇടവേളകളില്ലാതെ പ്രവര്‍ത്തിക്കും. മൂന്നരലക്ഷത്തോളം പേര്‍ക്കാണ് ഇനിയും ഓണക്കിറ്റ് കിട്ടാനുള്ളത്. ഇന്നലെ രാത്രി വരെയുള്ള കണക്ക് പ്രകാരം 2,59,944 കിറ്റുകളാണ് ആകെ വിതരണം ചെയ്തത്. ഇനിയും 3,27,737 പേര്‍ക്ക് കൂടി കിറ്റ് നല്‍കാന്‍ ഉണ്ട്. മുഴുവന്‍ റേഷന്‍കടകളിലും കിറ്റ് എത്തിച്ചിട്ടുണ്ടെന്നും ഇന്ന് തന്നെ വിതരണം പൂര്‍ത്തിയാക്കുമെന്നുമാണ് ഭക്ഷ്യവകുപ്പ് പറയുന്നത്.
