കോഴിക്കോട് - വിദ്യാർത്ഥിനിയെ തട്ടിക്കൊണ്ടുപോയി പീഡിപ്പിച്ചശേഷം വിവസ്ത്രയാക്കി കെട്ടിയിട്ട നിലയിൽ. കോഴിക്കോട് ജില്ലയിലെ കുറ്റ്യാടിക്കടുത്ത തൊട്ടിൽപ്പാലത്താണ് സംഭവം. വിദ്യാർത്ഥിനിയെ തട്ടിക്കൊണ്ടുപോയി പീഡിപ്പിച്ചശേഷം ആളൊഴിഞ്ഞ വീട്ടിൽ വിവസ്ത്രയാക്കി കെട്ടിയിടുകയായിരുന്നു.
പെൺകുട്ടിയെ കാണാനില്ലെന്ന് ഇന്നലെ ബന്ധുക്കൾ പോലീസിൽ പരാതി നൽകിയിരുന്നു. ഇതിന്റെ അടിസ്ഥാനത്തിലുള്ള തിരിച്ചിലിനിടെയാണ് സംഭവം ശ്രദ്ധയിൽ പെട്ടതെന്ന് പോലീസ് അറിയിച്ചു. പ്രതിയെ തിരിച്ചറിഞ്ഞിട്ടുണ്ടെന്നും കേസെടുത്ത് പ്രതിക്കായി തിരച്ചിൽ തുടരുകയാണെന്നും പോലീസ് പറഞ്ഞു.
പ്രതി ലഹരിക്കടിമയാണെന്നും സ്ഥിരമായി എം.ഡി.എം.എ ഉപയോഗിക്കുന്ന ആളാണെന്നും പോലീസ് പറഞ്ഞു. വിദ്യാർത്ഥിനിയുടെ മൊബൈൽ ഫോൺ കേന്ദ്രീകരിച്ചുള്ള പരിശോധനയിലാണ് ഒരു വീട്ടിലുണ്ടെന്ന വിവരം പോലീസിന് ലഭിച്ചത്. തുടർന്ന് പ്രസ്തുത വീട്ടിലെത്തിയപ്പോഴാണ് വിവസ്ത്രയാക്കി കെട്ടിയിട്ട നിലയിൽ വിദ്യാർത്ഥിനിയെ കണ്ടത്. ഉടനെ വസ്ത്രം ധരിപ്പിച്ച് ആശുപത്രിയിലെത്തിച്ച് വൈദ്യപരിശോധന നടത്തുകയായിരുന്നു. അതിലാണ് പീഡനവിവരം പുറത്തുവന്നത്. വിദ്യാർത്ഥിനിയുടെ മൊഴി രേഖപ്പെടുത്തിയിട്ടില്ല. അതിനുള്ള മാനസികാവസ്ഥയില്ല അവരെന്നാണ് വിവരം. വരും മണിക്കൂറിനുളളിൽ മൊഴി രേഖപ്പെടുത്തി കൂടുതൽ തെളിവുകൾ ശേഖരിക്കുമെന്ന് പോലീസ് പറഞ്ഞു.
