റിയാദ് - മയക്കുമരുന്ന് വിതരണ മേഖലയിൽ പ്രവർത്തിച്ച നാലംഗ സംഘത്തെ റിയാദ് പോലീസ് അറസ്റ്റ് ചെയ്തു. നിയമാനുസൃത ഇഖാമയിൽ രാജ്യത്ത് കഴിയുന്ന മൊറോക്കൊൻ യുവതിയും മൂന്നു സൗദി യുവാക്കളുമാണ് അറസ്റ്റിലായത്. 14.5 കിലോ ഹഷീഷും ലഹരി ഗുളികകളും രണ്ടു തോക്കുകളും പണവും പ്രതികളുടെ പക്കൽ കണ്ടെത്തി. തുടർ നടപടികൾക്ക് തൊണ്ടി സഹിതം സംഘത്തെ പിന്നീട് ബന്ധപ്പെട്ട വകുപ്പിന് കൈമാറിയതായി റിയാദ് പോലീസ് അറിയിച്ചു.
മറ്റൊരു സംഭവത്തിൽ വൻ ലഹരി ഗുളിക ശേഖരവുമായി രണ്ടു പാക്കിസ്ഥാനികളെ റിയാദിൽ നിന്ന് ജനറൽ ഡയറക്ടറേറ്റ് ഓഫ് നാർകോട്ടിക്‌സ് കൺട്രോൾ അറസ്റ്റ് ചെയ്തു. പ്രതികളുടെ പക്കൽ 17,780 ലഹരി ഗുളികകൾ കണ്ടെത്തി. ചോദ്യം ചെയ്യൽ അടക്കമുള്ള നടപടികൾ പൂർത്തിയാക്കി പ്രതികളെ പബ്ലിക് പ്രോസിക്യൂഷന് കൈമാറി.
