തിരുവനന്തപുരം - സംസ്ഥാന ചലച്ചിത്ര അവാര്‍ഡ് നിര്‍ണയവുമായി ബന്ധപ്പെട്ട് സംവിധായകന്‍ വിനയന്റെ പരാതിയില്‍ ചലച്ചിത്ര അക്കാദമി ചെയര്‍മാന്‍ രഞ്ജിത്തിനെതിരെ മുഖ്യമന്ത്രി അന്വേഷണം പ്രഖ്യാപിച്ചതായി തനിക്ക് അറിയില്ലെന്ന് മന്ത്രി സജി ചെറിയാന്‍. ഇക്കാര്യത്തില്‍ ഇതുവരെ ഔദ്യോഗികമായി അറിയിപ്പൊന്നും വന്നിട്ടില്ല. മുഖ്യമന്ത്രി ദല്‍ഹിയില്‍ നിന്ന് തിരിച്ചെത്തിയ ശേഷം ഇത് സംബന്ധിച്ച് കൂടുതല്‍ കാര്യങ്ങള്‍ ആലോചിക്കുമെന്നും സജി ചെറിയാന്‍ പറഞ്ഞു. രഞ്ജിത്തും വിനയനും മലയാള സിനിമയ്ക്ക് മികച്ച സംഭാവനകള്‍ നല്‍കിയവരാണ്. വിഷയങ്ങള്‍ രമ്യമായി പരിഹരിക്കും. അവാര്‍ഡിനെ ഇടിച്ചുതാഴ്ത്താനുള്ള ശ്രമങ്ങളാണ് ഇപ്പോള്‍ നടക്കുന്നത്. ഏറ്റവും മികച്ച ജൂറിയാണ് ഇത്തവണ ഉണ്ടായിരുന്നതെന്നും രഞ്ജിത്ത് അവാര്‍ഡ് നിര്‍ണയത്തില്‍ യാതൊരു സ്വാധീനം നടത്തിയിട്ടില്ലെന്നും സജി ചെറിയാന്‍ പറഞ്ഞു.
