കൊച്ചി- ഫ്‌ളാറ്റിനു മുന്നിൽ പാർക്ക് ചെയ്തിരുന്ന മാധ്യമ പ്രവർത്തകയുടെ വാഹനം അജ്ഞാതർ അടിച്ചു തകർത്തു. മനോരമ ന്യൂസ് ചീഫ് റിപ്പോർട്ടർ ആശാ ജാവേദിന്റെ ഹോണ്ട സിറ്റി കാറാണ് തകർത്തത്. ചിലവന്നൂർ ബ്ലൂ ലഗൂൺ ഫ്ലാറ്റിൽ ഞായറാഴ്ച രാത്രി ഒമ്പതിനോടടുത്താണ് സംഭവം. സി.സി.ടി.വി ക്യാമറാ നിരീക്ഷണമുള്ള സ്ഥലത്ത് എല്ലാ കണ്ണുകളും വെട്ടിച്ച് അതിവിദഗ്ധമായി അക്രമം നടത്തിയവരെക്കുറിച്ച് ഏകദേശ ധാരണയുണ്ടെന്നും സ്വന്തം വീട്ടിൽ പോലും രക്ഷയില്ലാത്ത നിലയിലേക്കാണ് നാടിന്റെ പോക്കെന്നും ആശാ ജാവേദ് പറഞ്ഞു. തേവര പോലീസ് സ്റ്റേഷനിൽ പരാതി നൽകിയിട്ടുണ്ട്. സി സി ടി വി ദൃശ്യങ്ങൾ പരിശോധിച്ചെന്നും അതിൽ അസ്വാഭാവികമായി ആരും അകത്തു കടന്നതായി കാണുന്നി്‌ല്ലെന്നും പോലീസ് പറഞ്ഞു.
സംഭവത്തിൽ പത്രപ്രവർത്തക യൂണിയൻ എറണാകുളം ജില്ലാ കമ്മിറ്റി ശക്തമായി പ്രതിഷേധിച്ചു.മാധ്യമ പ്രവർത്തകരുടെ സുരക്ഷക്കുപോലും ഭീഷണിയാകുന്ന ഇത്തരം സംഭവങ്ങളിൽ അക്രമികളെ ഉടൻ അറസ്റ്റ് ചെയ്ത് നിയമനടപടി സ്വീകരിക്കണമെന്ന് പ്രസ് ക്ലബ് പ്രസിഡന്റ് എം.ആർ. ഹരികുമാറും സെക്രട്ടറി എം.സൂഫി മുഹമ്മദും ആവശ്യപ്പെട്ടു.
