റിയാദ് - വില നിര്‍ണയിക്കാത്ത ഉല്‍പന്നങ്ങള്‍ക്ക് വ്യാപാര സ്ഥാപനങ്ങളില്‍ വ്യത്യസ്ത വില ഈടാക്കുന്നത് നിയമ ലംഘനമല്ലെന്ന് വാണിജ്യ, നിക്ഷേപ മന്ത്രാലയം വ്യക്തമാക്കി. ഉല്‍പന്നങ്ങളുടെ ലഭ്യതയും ആവശ്യവും വ്യാപാരികള്‍ തമ്മിലുള്ള മത്സരവുമാണ് വിലകള്‍ നിയന്ത്രിക്കുന്നത്. ഉല്‍പന്നങ്ങളുടെ വിലയില്‍ 100 ശതമാനം വരെയുണ്ടാകുന്ന ഏറ്റക്കുറച്ചിലുകള്‍ നിയമ ലംഘനമല്ല. നിത്യോപയോഗ വസ്തുക്കളുടെ വിലയില്‍ അന്യായമായ വര്‍ധന ശ്രദ്ധയില്‍ പെട്ടാല്‍ വിലകള്‍ നിയന്ത്രിക്കുന്നതിന് ഇടപെടാന്‍ മടിച്ചുനില്‍ക്കില്ലെന്നും വാണിജ്യ, നിക്ഷേപ മന്ത്രാലയം അറിയിച്ചു.
ഇതര വ്യാപാര സ്ഥാപനങ്ങളെ അപേക്ഷിച്ച് ഒരു കടയില്‍ ഇരട്ടി വില ഈടാക്കുന്നതായി ഉപയോക്താക്കളില്‍ ഒരാള്‍ മന്ത്രാലയത്തിന് പരാതി നല്‍കിയിരുന്നു. ഈ പരാതിയില്‍ സ്വീകരിച്ച നടപടികളുമായി ബന്ധപ്പെട്ട അന്വേഷണത്തിലാണ്, വിലകള്‍ പ്രത്യേകം നിശ്ചയിക്കാത്ത ഉല്‍പന്നങ്ങളുടെ വിലകളില്‍ 100 ശതമാനം വരെയുള്ള ഏറ്റക്കുറച്ചില്‍ നിയമ ലംഘനമല്ലെന്ന് മന്ത്രാലയം വ്യക്തമാക്കിയത്.
നിത്യോപയോഗ വസ്തുക്കളുടെ വില സ്ഥിരതക്കും ഉപയോക്താക്കള്‍ക്ക് ഗുണകരമാകുന്ന നിലയില്‍ പ്രാദേശിക വിപണിയില്‍ സ്വതന്ത്രവും ആരോഗ്യകരുമായ മത്സരം സൃഷ്ടിക്കുന്നതിനും മന്ത്രാലയം ശ്രമിച്ചുവരികയാണ്. അന്യായമായ നിലയില്‍ ഏതെങ്കിലും നിത്യോപയോഗ വസ്തുക്കളുടെ വില ഉയര്‍ത്തിയതായി ശ്രദ്ധയില്‍ പെട്ടാല്‍ അതേ കുറിച്ച് അന്വേഷണം നടത്തും. വ്യത്യസ്ത പ്രവിശ്യകളില്‍ ഉല്‍പന്നത്തിന് ഈടാക്കുന്ന വിലയും അയല്‍ രാജ്യങ്ങളില്‍ നിലവിലുള്ള വിലകളും താരതമ്യം ചെയ്തും വിപണിയിലുണ്ടായ മാറ്റങ്ങള്‍ പരിശോധിച്ചുമാണ് ഇക്കാര്യത്തില്‍ തുടര്‍ നടപടികള്‍ സ്വീകരിക്കുകയെന്നും വാണിജ്യ, നിക്ഷേപ മന്ത്രാലയം വ്യക്തമാക്കി.
