തിരുവനന്തപുരം- കെഎസ്ആർടിസി ബസിൽ പ്ലസ് ടു വിദ്യാർത്ഥിനിയെ ആക്രമിക്കുകയും തലയിൽ തുപ്പുകയും ചെയ്ത സംഭവത്തിൽ യുവാവ് അറസ്റ്റിൽ. ആറ്റിങ്ങൽ പൂവണത്തുംമൂട് വാടകയ്ക്ക് താമസിക്കുന്ന അനന്തു എന്ന ഇന്ദ്രജിത്തിനെ (25)യാണ് മംഗലപുരം പോലീസ് അറസ്റ്റ് ചെയ്തത്.
അനന്തു പെൺകുട്ടിയുടെ തലയിൽ തുപ്പിയതിനെ തടുർന്ന് പെൺകുട്ടി ബഹളം വെക്കുകയായിരുന്നു. ബസിൽ നിന്നു ഇറങ്ങിയോടിയ അനന്തുവിനെ പിന്നാലെ ഓടിയ ഓട്ടോറിക്ഷാ ഡ്രൈവർമാരും നാട്ടുകാരും ചേർന്നാണ് പിടികൂടിയത്. രാവിലെ എട്ട് മണിയോടെ പള്ളിപ്പുറത്തെ മംഗപുരത്തെ ബസ് സ്റ്റോപ്പിൽ പെൺകുട്ടി ഇറങ്ങാൻ തുടങ്ങുമ്പോഴായിരുന്നു ഉപദ്രവം.
ബസിൽ നിന്നു ഇറങ്ങിയോടിയ അനന്തു മതിലും ചാടിക്കടന്ന് തുണ്ടിൽ ക്ഷേത്രത്തിനു സമീപത്തെ മുണ്ടുകോണം വയൽ ഏലായിലേക്ക് ചാടിയതോടെ മുട്ടോളം ചേറിൽ പുതഞ്ഞു . ഇനിയും ഓടിയാൽ എറിഞ്ഞു വീഴ്ത്തുമെന്നു പിന്നാലെയെത്തിയവർ മുന്നറിയിപ്പു നൽകിയതോടെ യുവാവ് കീഴടങ്ങുകയായിരുന്നു.
ഇയാൾ പതിവായി ബസിൽ പെൺകുട്ടികളെ ഉപദ്രവിക്കാറുണ്ടെന്നു മംഗലപുരം പോ ലീസ് പറഞ്ഞു. കോടതിയിൽ ഹാജരാക്കിയ പ്രതിയെ കോടതി റിമാൻഡ് ചെയ്തു.
