കാഞ്ഞങ്ങാട് - വ്യാജരേഖ ഹാജരാക്കി കരിന്തളം കോളേജില്‍ താത്കാലിക അധ്യാപക ജോലി നേടിയ സംഭവത്തില്‍ കെ വിദ്യക്ക് ഇടക്കാല ജാമ്യം അനുവദിച്ചു. ഹൊസ്ദുര്‍ഗ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയാണ് ജാമ്യം അനുവദിച്ചത്. വിദ്യയെ കസ്റ്റഡിയില്‍ വേണമെന്ന് നീലേശ്വരം പൊലീസ് കോടതിയില്‍ ആവശ്യപ്പെട്ടില്ല. അന്വേഷണവുമായി സഹകരിക്കുമെന്ന് വിദ്യയുടെ അഭിഭാഷകന്‍ കോടതിയില്‍ അറിയിച്ചതോടെയാണ് ജാമ്യം ലഭിച്ചത്. വ്യാജ സര്‍ട്ടിഫിക്കറ്റ് കേസില്‍ മുന്‍ എസ്.എഫ്.ഐ നേതാവ് കെ.വിദ്യയെ നീലേശ്വരം പോലീസ് ഇന്ന് ചോദ്യം വരികയാണ്. ഇവരുടെ അറസ്റ്റ് രേഖപ്പെടുത്തിയിട്ടുണ്ട്. ഇതിനിടയിലാണ് കോടതി ജാമ്യം അനുവദിച്ചത്. ഇതോടെ വിദ്യയ്ക്ക റിമാന്‍ഡില്‍ പോകേണ്ടി വരില്ല. സ്‌റ്റേഷനില്‍ നിന്ന് തന്നെ ജാമ്യത്തില്‍ വിടും. ഇന്ന് രാവിലെയാണ് വിദ്യ ചോദ്യം ചെയ്യലിനായി ഹാജരായത്. പാലക്കാട്ടെ അട്ടപ്പാടി കോളേജില്‍ അഭിമുഖത്തിന് ചെന്നപ്പോഴാണ് മഹാരാജാസ് കോളേജിന്റെ പേരിലുള്ള പ്രവൃത്തി പരിചയ സര്‍ട്ടിഫിക്കറ്റ് വ്യാജമാണെന്ന് കണ്ടെത്തിയതും വിദ്യ അറസ്റ്റിലായതും. ഇതേ വ്യാജ രേഖ കാണിച്ചാണ് കരിന്തളം കോളേജില്‍ അധ്യപികയായി ജോലി ലഭിച്ചതെന്ന് കണ്ടെത്തിയതോടെയാണ് വിദ്യയക്കെതിരെ നീലേശ്വരം പോലീസ് കേസെടുത്തത്. പാലക്കാട്ടെ കേസില്‍ റിമാന്‍ഡിലായിരുന്ന വിദ്യയ്ക്ക് ജാമ്യം ലഭിച്ചതോടെ ചോദ്യം ചെയ്യലിന് ഹാജരാകാന്‍ നീലേശ്വരം പോലീസ് വിദ്യയ്ക്ക് നോട്ടീസ് നല്‍കിയിരുന്നു. തനിക്ക് ആരോഗ്യപ്രശ്‌നങ്ങളുണ്ടെന്നും ചൊവ്വാഴ്ചയേ ഹാജരാകുകയുള്ളൂവെന്നും വിദ്യ പോലീസിനെ നേരത്തെ അറിയിച്ചിരുന്നു.
