തിരുവനന്തപുരം - ഈ വർഷത്തെ ബലിപെരുന്നാളിന് ജൂൺ 28ന് സർക്കാർ പൊതു അവധി പ്രഖ്യാപിച്ച സാഹചര്യത്തിൽ ഇത് നിലനിർത്തി, കേരളത്തിലെ പെരുന്നാൾ ദിനമായ 29നും അവധി നല്കണമെന്ന് കേരള മുസ്‌ലിം ജമാഅത്ത് സംസ്ഥാന പ്രസിഡന്റ് കാന്തപുരം എ.പി അബൂബക്കർ മുസ്‌ലിയാർ ആവശ്യപ്പെട്ടു. ഇക്കാര്യം ചൂണ്ടിക്കാട്ടി മുഖ്യമന്ത്രി പിണറായി വിജയന് നിവേദനം നല്കി്‌യതായും അറിയിച്ചു.
സർക്കാർ 28നാണ് അവധി നേരത്തെ പ്രഖ്യാപിച്ചതെങ്കിലും മുസ്‌ലിംകൾ ദുൽഹിജ്ജ പത്തിന് ആചരിക്കുന്ന ബലി പെരുന്നാൾ കേരളത്തിൽ ജൂൺ 29 വ്യാഴാഴ്ചയാണെന്നാണ് കേരളത്തിലെ ഖാദിമാർ ഐക്യകണ്‌ഠേന പ്രഖ്യാപിച്ചത്. ഈ സാഹചരത്തിൽ പെരുന്നാൾ ദിനത്തെ പോലെ തന്നെ പ്രാധാന്യമർഹിക്കുന്ന ജൂൺ 28ലെ അവധി നിലനിർത്തി, പെരുന്നാൾ ദിനമായ 29നും അവധി നൽകണമെന്നാണ് നിവേദനത്തിൽ ആവശ്യപ്പെട്ടത്.
