ദുബായ്- യു.എ.ഇ പ്രസിഡന്റ്, ഷെയ്ഖ് മുഹമ്മദ് ബിൻ സായിദ് അൽ നഹ്യാൻ റഷ്യൻ പ്രസിഡന്റ് വ്‌ളാദമിർ പുടിനുമായി സെന്റ് പീറ്റേഴ്‌സ് ബർഗിൽ കൂടിക്കാഴ്ച നടത്തി. പ്രാദേശികവും അന്തർദേശീയവുമായ സ്ഥിരതയ്ക്കും സമാധാനത്തിനും പിന്തുണ നൽകുന്നതിന് ആശയവിനിമയത്തിന്റെയും സംഭാഷണത്തിന്റെയും പ്രാധാന്യം ശക്തിപ്പെടുത്തണമെന്ന് ഷെയ്ഖ് മുഹമ്മദ് അൽ നഹ്യാൻ പറഞ്ഞു. ഉക്രെയ്‌നിലെ പ്രതിസന്ധിക്ക് ചർച്ചകളിലൂടെ പരിഹാരം കാണേണ്ടതിന്റെ ആവശ്യകതയും അദ്ദേഹം ആവർത്തിച്ചു. പ്രതിസന്ധിയുടെ മാനുഷിക പ്രത്യാഘാതങ്ങൾ ലഘൂകരിക്കാനുള്ള ശ്രമങ്ങൾ ത്വരിതപ്പെടുത്തേണ്ടതിന്റെയും ഇരുവശത്തുമുള്ള തടവുകാരുമായുള്ള കൈമാറ്റ സംരംഭങ്ങളെ പിന്തുണയ്ക്കുന്നതിന്റെ പ്രാധാന്യവും ഊന്നിപ്പറഞ്ഞു.
യു.എ.ഇയും റഷ്യയും തമ്മിലുള്ള തന്ത്രപരമായ പങ്കാളിത്ത ചട്ടക്കൂടിന്റെ ഭാഗമായുള്ള ദീർഘകാല ബന്ധത്തെക്കുറിച്ച് ഇരു നേതാക്കളും ചർച്ച ചെയ്തു. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം കൂടുതൽ ശക്തിപ്പെടുത്തുന്നതിനുള്ള തങ്ങളുടെ പ്രതിബദ്ധത ഇരുവരും പ്രകടിപ്പിച്ചു.
പ്രാദേശികവും അന്തർദേശീയവുമായ സുരക്ഷയും സുസ്ഥിരതയും ഉറപ്പാക്കുന്നതിന് എല്ലാ രാജ്യങ്ങളുമായുള്ള യു.എ.ഇയുടെ തുടർച്ചയായ ആശയവിനിമയത്തിന്റെ ഭാഗമായാണ് സന്ദർശനം.
