തിരുവനന്തപുരം-പാളങ്ങളില്‍ അറ്റകുറ്റപ്പണികള്‍ നടക്കുന്നതിനാല്‍ കോട്ടയം- കൊല്ലം പാതയിലും ട്രെയിന്‍ നിയന്ത്രണം. ഈ മാസം 21ന് കൂടുതല്‍ ട്രെയിനുകള്‍ മുടങ്ങും. ആലുവ- അങ്കമാലി പാതയിലെ പാലം മാറ്റത്തിനു പുറമെ മാവേലിക്കര- ചെങ്ങന്നൂര്‍ പാതയിലും അറ്റകുറ്റപ്പണി നടത്താന്‍ റെയില്‍വേ തീരുമാനിച്ചതോടെയാണ് കൂടുതല്‍ ട്രെയിനുകള്‍ റദ്ദാക്കുന്നതടക്കമുള്ള നടപടികള്‍.
കൊച്ചുവേളി- ലോകമാന്യതിലക് ഗരീബ്രഥ്, പരശുറാം, രാജ്യറാണി, അമൃത ട്രെയിനുകള്‍ നേരത്തെ റെയില്‍വേ റദ്ദാക്കിയിരുന്നു. ഇതിന് പുറമെ പത്തിലധികം തീവണ്ടികള്‍ ഭാഗികമായും റദ്ദാക്കിയിരുന്നു. ഈ നിയന്ത്രണങ്ങള്‍ക്ക് പുറമെയാണ് കോട്ടയം- കൊല്ലം പാതയിലും നിയന്ത്രണം ഏര്‍പ്പെടുത്തുന്നത്.
കൊല്ലം- എറണാകുളം മെമു (06768, 06778) ഇരുവശത്തേയ്ക്കും എറണാകുളം- കൊല്ലം മെമു (06441), കായംകുളം- എറണാകുളം മെമു (16310), എറണാകുളം - കായംകുളം മെമു (16309), കൊല്ലം- കോട്ടയം സ്പെഷ്യല്‍ (06786), എറണാകുളം- കൊല്ലം (6769), കോട്ടയം- കൊല്ലം മെമു (6785), കായംകുളം- എറണാകുളം എക്‌സ്പ്രസ് (06450), എറണാകുളം- ആലപ്പുഴ മെമു (06015), ആലപ്പുഴ- എറണാകുളം എക്‌സ്പ്രസ് (06452) എന്നിവയാണ് 21-ന് റദ്ദാക്കിയത്.
നാഗര്‍കോവില്‍- കോട്ടയം (16366) 21ന് കൊല്ലത്ത് യാത്ര അവസാനിപ്പിക്കും. തിരുവനന്തപുരം - സെക്കന്തരാബാദ് ശബരി, കേരള എക്‌സ്പ്രസ് (12625), കന്യാകുമാരി- ബംഗളൂരു (16525), കണ്ണൂര്‍ ജനശതാബ്ദി (12082), തിരുവനന്തപുരം സെന്‍ട്രല്‍- ചെന്നൈ മെയില്‍ (12624), നാഗര്‍കോവില്‍- ഷാലിമാര്‍ (12659), തിരുവനന്തപുരം സെന്‍ട്രല്‍- ചെന്നൈ സൂപ്പര്‍ഫാസ്റ്റ് (12696), തിരുവനന്തപുരം- എറണാകുളം (16304) വഞ്ചിനാട്, പുനലൂര്‍- ഗുരുവായൂര്‍ (16327) എന്നിവ ആലപ്പുഴ പാതയിലൂടെ തിരിച്ചുവിടും. ഇവയ്ക്ക് ഹരിപ്പാട്, അമ്പലപ്പുഴ, ആലപ്പുഴ, ചേര്‍ത്തല, എറണാകുളം എന്നിവിടങ്ങളില്‍ സ്റ്റോപ്പുകളുണ്ടാകും.
