തിരുവനന്തപുരം - വിവാഹ ദിവസം വധുവിന്റെ ബന്ധുക്കള്‍ക്കെതിരെ പടക്കമെറിഞ്ഞ സംഭവത്തില്‍ വരനും കൂട്ടുകാരും ജയിലിലായി. പേരൂര്‍ക്കടയില്‍ വിവാഹത്തിന് ശേഷം വധുവിന്റെ വീട്ടില്‍ വെച്ച് നടന്ന് സല്‍ക്കാരത്തിനിടെ ഉണ്ടായ തര്‍ക്കത്തില്‍ വരനും സുഹൃത്തുക്കളും വധുവിന്റെ ബന്ധുക്കള്‍ക്കുനേരെ പടക്കം എറിയുകയായിരുന്നു. വരന്‍ പോത്തന്‍കോട് കലൂര്‍ മഞ്ഞമല വിപിന്‍ ഭവനില്‍ വിജിന്‍ (24), സുഹൃത്തുക്കളായ പോത്തന്‍കോട് പെരുതല അവനീഷ് ഭവനില്‍ ആകാശ് (22), ആറ്റിങ്ങല്‍ ഊരുപൊയ്ക പുളിയില്‍കണി വീട്ടില്‍ വിനീത് (28), ആറ്റിങ്ങല്‍ ഇളമ്പ വിജിത ഭവനില്‍ വിജിത് (23) എന്നിവരെയാണ് അറസ്റ്റ് ചെയ്തത്. ഇവരെ റിമാന്‍ഡ് ചെയ്ത് ജയിലേക്കയച്ചു. പ്രണയത്തിലായിരുന്ന ക്രൈസ്റ്റ് നഗര്‍ സ്വദേശിനിയും വിജിനും ഞായറാഴ്ചയാണ് വിവാഹിതരായത്. വൈകിട്ട് വധുവിന്റെ വീട്ടുകാര്‍ നടത്തിയ വിവാഹ സല്‍ക്കാരത്തിനിടെ വിജിന്റെ സുഹൃത്തും വധുവിന്റെ ബന്ധുക്കളായ യുവാക്കളും തമ്മില്‍ കയ്യാങ്കളി നടന്നു. ഇതില്‍ പ്രകോപിതനായി ഇറങ്ങിപ്പോയ വിജിന്‍ പോത്തന്‍കോട് നിന്നു സുഹൃത്തുക്കളെ വിളിച്ചുവരുത്തിയ ശേഷം വധുവിന്റെ ബന്ധുക്കള്‍ക്ക് നേരെ പടക്കം എറിയുകയായിരുന്നുവെന്ന് പൊലീസ് പറഞ്ഞു.
