കണ്ണൂര്‍ - മഴ പെയ്തതിനെ തുടര്‍ന്ന് വന്ദേഭാരത് എക്സ്പ്രസില് ചോര്‍ച്ചയെന്നുള്ള മാധ്യമ വാര്‍ത്തകള്‍ തെറ്റാണെന്ന് ഇന്ത്യന്‍ റെയില്‍വേ. എ സിയുടെ ഗ്രില്ലില്‍ നിന്നുള്ള വെള്ളം കോച്ചിന് ഉള്ളിലേക്ക് വീണതാണ് മഴയെന്ന രീതിയില്‍ പ്രചരിപ്പിച്ചതെന്നും ഇന്നലെ രാത്രി പെയ്ത മഴയത്തല്ല ഇത് സംഭവിച്ചതെന്നും റെയില്‍വേ അധികൃതര്‍ പറഞ്ഞു. എക്സിക്യൂട്ടീവ് കോച്ചുകളില്‍ ഒന്നിന്റെ എ സി ഗ്രില്ലില്‍ നിന്ന് വെള്ളം കോച്ചിനുള്ളിലേക്ക് വീഴുന്നത് ഇന്നലെ ഉദ്ഘാടന സര്‍വീസിനിടെ ശ്രദ്ധയില്‍ പെട്ടിരുന്നു. ഇതാണ് ചോര്‍ച്ചയാണെന്ന് ചിലര്‍ തെറ്റിദ്ധരിച്ചതെന്നും റെയില്‍വേ വ്യക്തമാക്കി. ട്രെയിനിനൊപ്പം യാത്ര ചെയ്യുന്ന ചെന്നൈ ഇന്റഗ്രല്‍ കോച്ച് ഫാക്ടറിയില്‍ നിന്നുള്ള വിദഗ്ധരും റെയില്‍വേ ജീവനക്കാരും ട്രെയിന്‍ പരിശോധിച്ച് എ സി ഗ്രില്ലിനുള്ളിലെ പ്രശ്നം പരിഹരിച്ചു.
