മക്ക- റമദാനിൽ വിശുദ്ധ ഹറമിൽ തിരക്ക് കൂടിയതോടെ ഉംറ നിർവഹിക്കാൻ എത്തുന്നവർക്ക് അനുമതിയുണ്ടോ എന്നുള്ള പരിശോധന കർശനമാക്കി. ഹറമിൽ തിരക്ക് നിയന്ത്രിക്കുന്നതിനും സുഗമമായ ഉംറ തീർത്ഥാടനത്തിനുമാണ് പരിശോധന ശക്തമാക്കിയത്. പെർമിറ്റില്ലാത്തവർ ഉംറ നിർവഹിക്കാൻ ഒരു കാരണവശാലും ശ്രമിക്കരുതെന്ന് ഹജ്-ഉംറ മന്ത്രാലയം ആവർത്തിച്ചു ആവശ്യപ്പെട്ടു. ഉംറ നിർവഹിക്കാൻ പെർമിറ്റ് നിർബന്ധമാണെന്നും ഹജ് മന്ത്രാലയം പുറത്തിറക്കിയിട്ടുള്ള നുസ്‌ക് അപ്ലിക്കേഷൻ വഴിയോ തവക്കൽന സർവീസ് അപ്ലിക്കേഷൻ വഴിയോ ഉംറ പെർമിറ്റുകൾ ലളിതമായി ഇഷ്യൂ ചെയ്യാനാകുമെന്ന് ഹജ് മന്ത്രാലയം വ്യക്തമാക്കി. തിക്കും തിരക്കുമില്ലാതെ പരമാവധി ആളുകൾക്ക് കർമങ്ങൾ പ്രയാസ രഹിതമായി നിർവഹിക്കാൻ റമദാൻ മാസത്തിൽ ഒരാൾക്ക് ഒരു തവണ മാത്രമേ ഉംറ നിർവഹിക്കാൻ പെർമിറ്റ് ലഭ്യമാകുകയുള്ളൂ. ഇരു ഹറമുകളിലും നമസ്‌കരിക്കാൻ പെർമിറ്റ് എടുക്കേണ്ടതില്ല.
