കൊച്ചി- നിരോധിത സിന്തറ്റിക് ഡ്രഗ് വിതരണം നടത്തുന്ന സംഘത്തിലെ പ്രധാനിയായ നൈജീരിയന്‍ സ്വദേശിയെ പ്രത്യേക അന്വേഷണ സംഘം ബംഗളൂരുവില്‍ പിടികൂടി. എം. ഡി. എം. എ. കൈവശം വെച്ച കേസില്‍ കാക്കനാട് സ്വദേശി ഷെമിം ഷാ അറസ്റ്റിലായ കേസിന്റെ തുടരന്വേഷണത്തിലാണ് നൈജീരിയന്‍ സ്വദേശി ഒകോന്‍ക്വോ ഇമ്മാനുവല്‍ ചിദുബി (32) ബംഗളൂരുവില്‍ പിടിയിലായത്.
തൃക്കാക്കര അസിസ്റ്റന്റ് പോലീസ് കമ്മീഷണറുടെ നേതൃത്വത്തിലുള്ള അന്വേഷണ സംഘമാണ് നൈജീരിയന്‍ സ്വദേശിയെ വലയിലാക്കിയത്. കേരളത്തിലും രാജ്യാന്തര തലത്തിലും നിരോധിത സിന്തറ്റിക് ഡ്രഗ് വിതരണം നടത്തുന്ന ബംഗളൂരു കേന്ദ്രീകരിച്ച് പ്രവര്‍ത്തിക്കുന്ന സംഘത്തിലെ പ്രധാനിയാണ് ഇയാള്‍. കാക്കനാട് സ്വദേശി ഷമീം ഷായുടെ പക്കല്‍ നിന്നും കണ്ടെടുത്ത മയക്കുമരുന്നിന്റെ ഉറവിടം കണ്ടെത്തുന്നതിനായി കൊച്ചി സിറ്റി പോലീസ് കമ്മീഷണര്‍ കെ. സേതുരാമന്റെ നിര്‍ദ്ദേശപ്രകാരമാണ് തൃക്കാക്കര അസിസ്റ്റന്റ് പോലീസ് കമ്മീഷണര്‍ പി. വി. ബേബിയുടെ നേതൃത്വത്തില്‍ പ്രത്യേക അന്വേഷണ സംഘം രൂപീകരിച്ചത്.
നൈജീരിയന്‍ സ്വദേശിയെ കാക്കനാട് ജഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കും. അന്വേഷണ സംഘത്തില്‍ ഇന്‍ഫോപാര്‍ക്ക് പോലീസ് സ്റ്റേഷന്‍ ഇന്‍സ്‌പെക്ടര്‍ വിപിന്‍ദാസ്, തൃക്കാക്കര പോലീസ് സ്റ്റേഷന്‍ സബ്് ഇന്‍സ്‌പെക്ടര്‍ പി. ബി. അനീഷ്, അമ്പലമേട് പോലീസ് സ്റ്റേഷന്‍ എസ്. ഐ. അരുണ്‍കുമാര്‍, പോലീസുദ്യോഗസ്ഥരായ ലെജിത്ത്, ജാബിര്‍, രഞ്ജിത്ത്, സൈബര്‍ സെല്‍ പോലീസ് ഉദ്യോഗസ്ഥന്‍ വിപിന്‍ എന്നിവരും ഉണ്ടായിരുന്നു.
മയക്കുമരുന്ന് കൂടുതല്‍ അളവില്‍ കേരളത്തിലെത്തിക്കുന്ന റാക്കറ്റുകളെ കേന്ദ്രീകരിച്ചും കേരളം ഉള്‍പ്പെടെയുള്ള പലയിടങ്ങളിലും മയക്കുമരുന്ന് എത്തിച്ചിട്ടുണ്ടെന്നുള്ള വിവരത്തെ കുറിച്ചും പോലിസ് അന്വേഷണം തുടരുന്നുണ്ട്.
