മട്ടാഞ്ചേരി- യുവാവിനെ ബൈക്കില്‍ കയറ്റി കൊണ്ടുപോയി മര്‍ദ്ദിച്ചു കൊലപ്പെടുത്താന്‍ ശ്രമിച്ച കേസില്‍ പ്രതികള്‍ പിടിയിലായി. ഫോര്‍ട്ട് കൊച്ചി ഭാഗത്തുള്ള യുവാവിനെ മട്ടാഞ്ചേരി കമ്മ്യൂണിറ്റി ഹാളിനു സമീപത്തു നിന്നും നിര്‍ബന്ധിച്ച് ബൈക്കില്‍ കയറ്റി കൊണ്ടുപോവുകയായിരുന്നു. തുടര്‍ന്ന് മരക്കടവ് ഭാഗത്ത് വെച്ച് മര്‍ദ്ദിക്കുകയും കൊലപ്പെടുത്താന്‍ ശ്രമിക്കുകയും ചെയ്ത കേസിലെ അഞ്ച് പ്രതികളില്‍ രണ്ടുപേരെയാണ് മട്ടാഞ്ചേരി പോലീസ് അറസ്റ്റ് ചെയ്തത്.
മട്ടാഞ്ചേരി പുതിയറോഡിലെ ഫിറോസ് (30), കപ്പലണ്ടിമുക്ക് പുത്തന്‍വീട് ഷബീര്‍ (33) എന്നിവരാണ് അറസ്റ്റിലായത്. ഇവരെ കോടതിയില്‍ ഹാജരാക്കി റിമാന്റ് ചെയ്തു. മറ്റു പ്രതികള്‍ക്കായി അന്വേഷണം നടത്തിവരുകയാണെന്ന് പോലീസ് അറിയിച്ചു.
പ്രതികള്‍ക്ക് യുവാവിന്റെ സുഹൃത്തിനെ കാണിച്ചു കൊടുക്കാത്ത വിരോധത്താല്‍ ഫെബ്രുവരി 28ന് പുലര്‍ച്ചെ രണ്ടര മണിക്കാണ് മട്ടാഞ്ചേരി ബസാര്‍ റോഡില്‍ കുരിയച്ചന്‍ പള്ളിക്ക് സമീപം വെച്ച് പ്രതികള്‍ യുവാവിനെ കയറ്റിക്കൊണ്ടു പോയത്. മര്‍ദ്ദനത്തില്‍ ഗൂരതരമായി പരിക്കുപറ്റിയ യുവാവ് ചികില്‍സയിലാണ്.
മട്ടാഞ്ചേരി പോലീസ് അസിസ്റ്റന്റ് കമ്മീഷണര്‍ മനോജ്. കെ. ആറിന്റെ നിര്‍ദേശപ്രകാരം മട്ടാഞ്ചേരി പോലീസ് ഇന്‍സ്‌പെക്ടര്‍ തൃദീപ് ചന്ദ്രന്റെ നേതൃത്വത്തില്‍ നടത്തിയ അന്വേഷണത്തില്‍ സബ് ഇന്‍സ്‌പെക്ടര്‍ ഹരിശങ്കര്‍ എസ്. സി. പി. ഒ സുനില്‍കുമാര്‍, സി. പി. ഒമാരായ ജെയ്‌സണ്‍ സനീഷ് എന്നിവര്‍ ചേര്‍ന്നാണ് പ്രതികളെ പിടികൂടിയത്.
