കോഴിക്കോട് : കരിപ്പൂര്‍ വിമാനത്താവളത്തില്‍ നിന്ന് ദമാമിലേക്ക് പോയ എയര്‍ ഇന്ത്യ എക്‌സ്പ്രസ് വിമാനം സാങ്കേതിക തകരാറിനെ തുടര്‍ന്ന് സുരക്ഷിതമായി തിരുവനന്തപുരം വിമാനത്താവളത്തില്‍ ലാന്‍ഡിംഗ് നടത്തി. തിരുവനന്തപുരം വിഴിഞ്ഞം ഭാഗത്തിന് മകളിലൂടെ പറന്നാണ് ഇന്ധനം കടലില്‍ ഒഴുക്കി കളഞ്ഞ ശേഷമാണ് തിരിച്ചിറക്കിയത്. ഇറങ്ങുന്ന സമയത്ത് ആവശ്യത്തിലധികം ഇന്ധനം വിമാനത്തിലുണ്ടായാല്‍ തീപ്പിടുത്തത്തിനടക്കം സാധ്യതയുണ്ടെന്നതിന്റെ അടിസ്ഥാനത്തിലാണ് ഇന്ധനം ഒഴുക്കി കളഞ്ഞത്. കരിപ്പൂരില്‍ നിന്ന് രാവിലെ 9.45 ന് പറന്നുയരുമ്പോള്‍ പിന്‍ഭാഗം താഴെ ഉരസിയിരിന്നു. ഇത് മൂലം വിമാനത്തിന് ഹൈഡ്രോളിക് തകരാര്‍ സംഭവിക്കുകയായിരുന്നു.
വിഷയം ശ്രദ്ധയില്‍പെട്ട ഉടന്‍ തന്നെ വിമാനം വഴിതിരിച്ചു വിട്ട് തിരുവനന്തപുരം വിമാനത്താവളത്തില്‍ അടിയന്തിര ലാന്‍ഡിങ്ങിന് നിര്‍ദേശം നല്‍കുകയായിരുന്നു. വിമാനത്തില്‍ 168 യാത്രക്കാരുണ്ടെന്ന് വിമാനത്താവള അധികൃതര്‍ അറിയിച്ചു.
