പാലക്കാട്- ധോണിയില്‍ വീണ്ടും കാട്ടാന ശല്യം. പി ടി 7 എന്ന ആനയാണ് ഇന്നലെ രാത്രി ജനവാസ മേഖലയില്‍ ഇറങ്ങിയത്. പടക്കം പൊട്ടിച്ചാണ് ആനയെ തുരത്തിയത്. രാത്രി തന്നെ ആന കാടുകയറിയെന്നാണ് പ്രദേശവാസികളുടെ നിഗമനം. ആന വീണ്ടും എത്തുമോയെന്ന ഭയത്തിലാണ് ജനങ്ങള്‍.
മുമ്പ് ഒരാളെ കൊലപ്പെടുത്തുകയും മറ്റൊരാളെ ഗുരുതരമായി പരിക്കേല്‍പ്പിക്കുകയും ചെയ്ത ആനയാണ് ഇപ്പോള്‍ ആശങ്ക ഉയര്‍ത്തുന്നത്. വ്യാഴാഴ്ചയും ആനയിറങ്ങി പ്രദേശത്തെ കൃഷി നശിപ്പിച്ചിരുന്നു. ഈ ആനയെ മയക്കുവെടി വച്ച് പിടികൂടാനുള്ള നടപടിക്രമങ്ങള്‍ ഇതിനോടകം ആരംഭിച്ചിട്ടുണ്ട്. പത്ത് ദിവസത്തിനകം ആനയെ പിടികൂടാന്‍ സാധിക്കുമെന്നാണ് വനംവകുപ്പ് പ്രതീക്ഷിക്കുന്നത്.
