തിരുവനന്തപുരം-വനിത കണ്ടക്ടര്‍മാരുള്ള കെഎസ്ആര്‍ടിസി ബസില്‍ കണ്ടക്ടറുടെ സീറ്റിനരികില്‍ സ്ത്രീയാത്രക്കാരെ മാത്രമേ അനുവദിക്കുകയുള്ളൂ. ഈ സീറ്റില്‍ പുരുഷന്മാര്‍ ഇരിക്കുന്നത് ബുദ്ധിമുട്ടാണെന്ന് വനിതാ കണ്ടക്ടര്‍മാര്‍ പരാതിപ്പെട്ടതിനെത്തുടര്‍ന്നാണ് നടപടി. ഇതുസംബന്ധിച്ച് രണ്ടുവര്‍ഷംമുമ്പ് ഉത്തരവ് ഇറങ്ങിയിരുന്നു. ഒപ്പമിരുന്ന പുരുഷയാത്രക്കാരില്‍നിന്ന് മോശം അനുഭവമുണ്ടായതായി ചില വനിതാ കണ്ടക്ടര്‍മാര്‍ പരാതിപ്പെട്ടിരുന്നു. ഈ സീറ്റില്‍ പുരുഷന്മാര്‍ ഇരിക്കുന്നത് ബുദ്ധിമുട്ടാണെന്ന വനിതാ കണ്ടക്ടര്‍മാരുടെ ആവശ്യം പരിഗണിച്ചാണ് നടപടി. സ്ത്രീസുരക്ഷയ്ക്കുവേണ്ടിയാണ് ക്രമീകരണമെന്ന് കെഎസ്ആര്‍ടിസി അധികൃതര്‍ പറഞ്ഞു. ബസില്‍ വാതിലിനുസമീപം രണ്ടുപേര്‍ക്ക് ഇരിക്കാന്‍ കഴിയുന്ന സീറ്റിലാണ് കണ്ടക്ടര്‍ക്ക് സീറ്റ് അനുവദിച്ചിട്ടുള്ളത്. അതേസമയം വനിതാ കണ്ടക്ടറാണ് ബസിലുള്ളതെങ്കില്‍ പുരുഷന്മാര്‍ക്ക് സീറ്റ് നഷ്ടമാകും. ഈ നടപടി അപരിഷ്‌കൃതമായ സംവിധാനമാണെന്നും വിമര്‍ശനമുണ്ട്.
