അബുദാബി- കോവിഡ് നിയന്ത്രണങ്ങള്‍ പൂര്‍ണമായും റദ്ദാക്കിയതോടെ വാണിജ്യ സമുച്ചയങ്ങളില്‍ ജനത്തിരക്കേറി. ഗ്രീന്‍ പാസ് നിയമം ഇന്നലെ മുതലും ഇ.ഡി.ഇ സ്‌കാനര്‍ പരിശോധന കഴിഞ്ഞ മാസം 14 മുതലും പിന്‍വലിച്ചതോടെയാണ് സന്ദര്‍ശകര്‍ ഏറിയത്. പ്രവേശന നിബന്ധനകള്‍ മൂലം ഷോപ്പിംഗ് മാളുകളില്‍ എത്തുന്നവരുടെ എണ്ണം കുറഞ്ഞിരുന്നു.
അബുദാബിയിലെ നിബന്ധനകള്‍ കാരണം ഇതര എമിറേറ്റില്‍ നിന്നുള്ളവരുടെ വരവും കുറവായിരുന്നു. നിയന്ത്രണങ്ങള്‍ മാറ്റിയതോടെ അബുദാബിയിലെ ഷോപ്പിംഗ് മാളുകളില്‍ നിന്ന് ഗ്രീന്‍ പാസ് സ്റ്റിക്കറുകള്‍ നീക്കി. ഇതോടെ അബുദാബി നിവാസികള്‍ മാസംതോറും നടത്തിയിരുന്ന പിസിആര്‍ പരിശോധനയും നടത്തിയിരുന്നതും ഒഴിവായി.
ആരാധനാലയങ്ങളില്‍ മാസ്‌ക് നിബന്ധനയും പിന്‍വലിച്ചു. അകലം പാലിക്കല്‍ നേരത്തെ ഒഴിവാക്കിയിരുന്നു. ഇതോടെ വ്യാപാര സ്ഥാപനങ്ങളും ആരാധനാലയങ്ങളും ഇനി കൂടുതല്‍ സജീവമാകും.
