തിരുവനന്തപുരം- ഓണസദ്യ മാലിന്യത്തിലേക്ക് വലിച്ചെറിഞ്ഞു പ്രതിഷേധിച്ച ശുചീകരണ തൊഴിലാളികളെ പിരിച്ചുവിച്ച നടപടി വിഴുങ്ങാന്‍ മേയര്‍ ആര്യ രാജേന്ദ്രന്‍ നിര്‍ബന്ധിതയായത് സി.പി.എം സമ്മര്‍ദത്തില്‍. മേയര്‍ ആര്യരാജേന്ദ്രനും സി.പി.എം ജില്ലാ നേതൃത്വവും നടത്തിയ ചര്‍ച്ചയിലാണ് തിരിച്ചെടുക്കാന്‍ ധാരണയായതെങ്കിലും മേയറുടെ എടുത്തുചാട്ടത്തിന് പാര്‍ട്ടി നല്‍കിയ ശിക്ഷയാണിതെന്നാണ് വിലയിരുത്തല്‍. തൊഴിലാളികള്‍ക്കെതിരായ നടപടി അന്വേഷണത്തിന്റെ ഭാഗം മാത്രമെന്ന് പ്രതികരിച്ച് തലയൂരുകയാണ് മേയര്‍.
തൊഴിലാളികളുടെ വിശദീകരണം കേള്‍ക്കാതെയുള്ള നടപടിക്കെതിരെ ഇടത്‌കേന്ദ്രങ്ങളില്‍ നിന്നടക്കം വിമര്‍ശനങ്ങള്‍ ഉയര്‍ന്നിരുന്നു. പ്രതിഷേധിച്ചവരെ പിരിച്ചുവിടുന്നത് പാര്‍ട്ടി നയമല്ലെന്ന് സി.പി.എം സംസ്ഥാന സെക്രട്ടറി എം.വി ഗോവിന്ദനും പ്രതികരിച്ചതിന് പിന്നാലെയാണ് വിഷയത്തില്‍ നഗരസഭ തിരുത്തലിനൊരുങ്ങുന്നത്.
സി.പി.എം ജില്ലാ നേതൃത്വവും മേയറും തമ്മിലുള്ള ചര്‍ച്ചയിലാണ് തൊഴിലാളികള്‍ക്കെതിരായ നടപടി പിന്‍വലിക്കാന്‍ ധാരണയായത്. ഉദ്യോഗസ്ഥര്‍ക്കെതിരായ തൊഴിലാളികളുടെ പരാതി ഭരണസമിതി പരിശോധിക്കുമെന്നുമെന്നും മേയര്‍ പറഞ്ഞു.
