തിരുവനന്തപുരം- തിരുവനന്തപുരം പൗഡിക്കോണത്ത് കല്ലത്തറ ഭഗവതി വിലാസം വീട്ടില്‍ വാടകയ്ക്ക് താമസിക്കുന്ന വിജയമ്മയെ (80) വീട്ടിനുള്ളില്‍ മരിച്ച നിലയില്‍ കണ്ടെത്തി. കൊലപാതകമെന്നാണ് പ്രാഥമിക നിഗമനം.
ഇന്നലെ രാത്രിയാണ് വീട്ടിനുള്ളിലെ കട്ടിലിനടിയില്‍ മരിച്ച നിലയില്‍ കണ്ടെത്തിയത്. ശരീരത്തിലും മുഖത്തും അടിയേറ്റ പാടുണ്ട്. മൃതദേഹത്തിന് രണ്ട് ദിവസത്തെ പഴക്കമുണ്ടെന്നും സംശയിക്കുന്നു.
വിജയമ്മയും ഇവര്‍ക്കൊപ്പം ഇരു കാലുകളുമില്ലാത്ത മകന്‍ ഗണേഷ് കുമാറുമായിരുന്നു ഇവിടെ താമസം. മകനാണ് അമ്മ മരിച്ച വിവരം ബന്ധുക്കളെ അറിയിച്ചത്.
മൃതദേഹത്തിന് രണ്ട് ദിവസത്തെ പഴക്കം സംശയിക്കുന്ന സാഹചര്യത്തില്‍ മകന്‍ മരണ വിവരം പറയാന്‍ വൈകിയതിന്റെ കാരണമാണ് പോലീസ് അന്വേഷിക്കന്നത്. കാര്യങ്ങള്‍ തിരക്കിയിപ്പോള്‍ ഇയാള്‍ പരസ്പര വിരുദ്ധമായാണ് കാര്യങ്ങള്‍ പറയുന്നതെന്നും പോലീസ് പറയുന്നു.
പോസ്റ്റുമോര്‍ട്ടത്തിന് ശേഷമേ മരണ കാരണത്തെക്കുറിച്ച് വ്യക്തത വരൂ എന്ന് പോലീസ് പറഞ്ഞു.
