യാമ്പു- ഇന്ത്യയുടെ 75ാം സ്വാതന്ത്ര്യ വാർഷികത്തോടനുബന്ധിച്ച് പ്രവാസി സാംസ്‌കാരിക വേദി യാമ്പു മേഖല സ്വാതന്ത്ര്യ സംരക്ഷണ സംഗമം സംഘടിപ്പിച്ചു. പ്രവാസി യാമ്പു, മദീന, തബൂക്ക് മേഖല പ്രസിഡന്റ് സോജി ജേക്കബ് ഉദ്ഘാടനം ചെയ്തു.
രാജ്യത്തിന്റെ ഐക്യവും മതേതരത്വവും കാത്തുസൂക്ഷിക്കുന്ന മൂല്യാധിഷ്ഠിത രാഷ്ട്രീയ കൂട്ടുകെട്ട് ഉണ്ടാക്കി ഫാസിസ്റ്റ് ശക്തികൾക്കെതിരായ പോരാട്ടം ശക്തമാക്കേണ്ടത് കാലഘട്ടത്തിന്റെ അനിവാര്യതയാണെന്ന് അദ്ദേഹം പറഞ്ഞു. മേഖലാ സെക്രട്ടറി നസീറുദ്ദീൻ ഇടുക്കി മുഖ്യ പ്രഭാഷണം നടത്തി.
75 വർഷം പിറകിലേക്ക് ഇന്ത്യയെയും അതിന്റെ സ്വാതന്ത്ര്യത്തെയും തൂത്തെറിയുന്ന ഫാസിസ്റ്റ് ശക്തികളുടെ ആസൂത്രിത അജണ്ടക്കെതിരെ യോജിച്ച സമരം പ്രഖ്യാപിക്കാൻ കൂടി സ്വാതന്ത്ര്യ ദിനാഘോഷ പരിപാടികൾ നടത്തുമ്പോൾ നമുക്ക് കഴിയേണ്ടതുണ്ടെന്ന് അദ്ദേഹം അഭിപ്രായപ്പെട്ടു.
യൂത്ത് ഇന്ത്യ യാമ്പു ജനറൽ സെക്രട്ടറി ആഷിക് തിരൂർ പ്രസംഗിച്ചു. വാഗൺ ട്രാജഡി പോലുള്ള നൂറുകണക്കിന് പോരാട്ടങ്ങളിൽ വീര മൃത്യു വരിച്ച ധീര ദേശാഭിമാനികളെ ഓർത്തുകൊണ്ടല്ലാതെ 75ാം വാർഷികാഘോഷ പരിപാടികൾ നടത്താൻ കഴിയില്ലെന്ന് അദ്ദേഹം ചൂണ്ടിക്കാട്ടി. സലിം വേങ്ങര, ശൗക്കത്ത് എടക്കര, ജലാൽ ഹംസ മതിലകം എന്നിവർ ആശംസാ പ്രസംഗം നടത്തി. ദേശീയ ഗാനത്തോടെ പരിപാടി സമാപിച്ചു. പ്രവാസി യാമ്പു ടൗൺ ജനറൽ സെക്രട്ടറി സഫീൽ കടന്നമണ്ണ സ്വാഗതവും ഫൈസൽ പത്തപ്പിരിയം നന്ദിയും പറഞ്ഞു. താഹിർ ചേളന്നൂർ, നാസർ തൊടുപുഴ, ഫൈസൽ കോയമ്പത്തൂർ എന്നിവർ പരിപാടിക്ക് നേതൃത്വം നൽകി.
