റിയാദ് - പുതിയ സ്ഥാപനങ്ങളുടെ പേരിലേക്ക് സ്‌പോണ്‍സര്‍ഷിപ്പ് മാറുന്ന തൊഴിലാളികളുടെ ലെവി, വര്‍ക്ക് പെര്‍മിറ്റ് ഫീസ് കുടിശ്ശികകളും ഇഖാമ പുതുക്കാന്‍ കാലതാമസം വരുത്തിയതിനുള്ള പിഴകളും പഴയ സ്ഥാപനങ്ങളുടെ മേല്‍ ചുമത്താന്‍ മാനവശേഷി, സാമൂഹിക വികസന മന്ത്രാലയം തീരുമാനിച്ചു. ജൂണ്‍ ഒമ്പതിനും അതിനു ശേഷവും സ്‌പോണ്‍സര്‍ഷിപ്പ് മാറ്റുന്ന തൊഴിലാളികളുടെ ലെവി, വര്‍ക്ക് പെര്‍മിറ്റ് ഫീസ് കുടിശ്ശികകളും പിഴകളും ആണ് പഴയ തൊഴിലുടമകളുടെ പേരില്‍ രേഖപ്പെടുത്തുക. ഇത്തരം തൊഴിലാളികളുടെ ലെവി, വര്‍ക്ക് പെര്‍മിറ്റ് ഫീസ് കുടിശ്ശികകളും പിഴകളും പുതിയ സ്ഥാപനങ്ങളുടെ മേല്‍ ചുമത്തില്ല.
പുതിയ തൊഴിലുടമകളുടെ പേരിലേക്ക് സ്‌പോണ്‍സര്‍ഷിപ്പ് മാറ്റുന്ന വിദേശ തൊഴിലാളികളുടെ ലെവി, വര്‍ക്ക് പെര്‍മിറ്റ് ഫീസ് കുടിശ്ശികകളും ഇഖാമ പുതുക്കാന്‍ കാലതാമസം വരുത്തിയതിനുള്ള പിഴകളും പഴയ സ്ഥാപനങ്ങളുടെ മേല്‍ ചുമത്താനുള്ള തീരുമാനം ഖിവാ പ്ലാറ്റ്‌ഫോം നടപ്പാക്കാന്‍ തുടങ്ങി. ജൂണ്‍ ഒമ്പതിനു മുമ്പ് സ്‌പോണ്‍സര്‍ഷിപ്പ് മാറ്റിയ തൊഴിലാളികള്‍ക്ക് പുതിയ തീരുമാനം പ്രകാരമുള്ള ആനുകൂല്യം ലഭിക്കില്ല.
പ്രതീക്ഷിക്കാത്ത അധിക ബാധ്യതകള്‍ കൂടാതെ പ്രവര്‍ത്തിക്കാന്‍ പുതിയ സ്ഥാപനങ്ങള്‍ക്ക് അവസരമൊരുക്കാനാണ് പുതിയ തീരുമാനത്തിലൂടെ ലക്ഷ്യമിടുന്നത്. ഇതുവരെ തൊഴിലാളികളുടെ സ്‌പോണ്‍സര്‍ഷിപ്പ് ഏറ്റെടുക്കുന്ന പുതിയ സ്ഥാപനങ്ങളാണ് വര്‍ക്ക് പെര്‍മിറ്റ് ഫീസ്, ലെവി കുടിശ്ശികകളും ഇഖാമ പുതുക്കാന്‍ കാലതാമസം വരുത്തുന്നതിനുള്ള പിഴകളും വഹിക്കേണ്ടിയിരുന്നത്.
