മയാമി - ലോക ഒന്നാം നമ്പർ ടെന്നിസ് താരങ്ങളായ റോജർ ഫെദരറും സിമോണ ഹാലെപ്പും മയാമി ഓപണിൽ നിന്ന് പുറത്തായി. യോഗ്യതാ റൗണ്ടിലൂടെ വന്ന തനാസി കോക്കിനാക്കിസാണ് പുരുഷ സിംഗിൾസ് രണ്ടാം റൗണ്ടിൽ ഫെദരറെ 3-6, 6-3, 7-6 (7-4) ന് അട്ടിമറിച്ചത്. ലോക റാങ്കിംഗിൽ 175 ാം സ്ഥാനക്കാരനാണ് കോക്കിനാക്കിസ്. പുതിയ റാങ്കിംഗിൽ റഫായേൽ നദാൽ ഒന്നാം സ്ഥാനത്ത് തിരിച്ചെത്തും. കഴിഞ്ഞ വർഷത്തേതു പോലെ ഫ്രഞ്ച് ഓപൺ ഉൾപ്പെടെ ക്ലേ കോർട് സീസണിൽ വിട്ടുനിൽക്കുമെന്ന് ഫെദരർ വെളിപ്പെടുത്തി.
വനിതാ ഒന്നാം നമ്പർ ഹാലെപ്പിനെ മൂന്നാം റൗണ്ടിൽ പോളണ്ടിന്റെ അഗ്‌നിയേസ്‌ക റാഡ്‌വാൻസ്‌ക 3-6, 6-2, 6-3 ന് തോൽപിച്ചു. ഇന്ത്യൻവെൽസ് സെമിയിൽ ജപ്പാന്റെ നവോമി ഒസാക്കയും ഹാലെപ്പിനെ കീഴടക്കിയിരുന്നു. റാഡ്‌വാൻസ്‌ക 2014 ലെ ചാമ്പ്യനാണ്. കുട്ടിയുടെ സംരക്ഷണാവകാശം സംബന്ധിച്ച തർക്കത്തിനു ശേഷം തിരിച്ചെത്തിയ മുൻ ഒന്നാം നമ്പർ വിക്‌ടോറിയ അസരെങ്കയെയാണ് റാഡ്‌വാൻസ്‌ക നേരിടുക. അസരെങ്ക 2-6, 6-4, 6-1 ന് അനസ്താസിയ സെവസ്റ്റോവയെ തോൽപിച്ചു.
