പാലക്കാട്- വാളയാര്‍ ചെക്ക് പോസ്റ്റില്‍ വിജിലന്‍സ് നടത്തിയ മിന്നല്‍ പരിശോധനയില്‍ കൈക്കൂലിയായി നല്‍കിയ 67,000 രൂപ പിടിച്ചു. മോട്ടോര്‍ വാഹന വകുപ്പിന്റെ ചെക്ക് പോസ്റ്റിലാണ് പാലക്കാട് നിന്നുള്ള വിജിലന്‍സ് സംഘം പരിശോധന നടത്തിയത്. ഉദ്യോഗസ്ഥര്‍ കൈക്കൂലി സ്വീകരിച്ച ശേഷം പുറത്തു കടത്താന്‍ ഏജന്റിനു കൈമാറിയ പണമാണ് പിടിച്ചെടുത്തത്.
സംഭവവുമായി ബന്ധപ്പെട്ട് അഞ്ച് ഉദ്യോഗസ്ഥര്‍ക്കെതിരെ നടപടിക്ക് ശുപാര്‍ശ ചെയ്തിട്ടുണ്ട്. മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ബിനോയ്, അസിസ്റ്റന്റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ ജോര്‍ജ്, പ്രവീണ്‍, അനീഷ്, കൃഷ്ണ കുമാര്‍ എന്നിവര്‍ക്കെതിരെയാണ് നടപടിക്ക് ശുപാര്‍ശ.
പുലര്‍ച്ചെ രണ്ട് മണിയോടെയാണ് വിജിലന്‍സ് സംഘം വേഷം മാറി പരിശോധനയ്‌ക്കെത്തിയത്. ഇന്നലെ രാത്രി എട്ട് മണിയോടെ
ഡ്യൂട്ടി മാറി കയറിയ ഉദ്യോഗസ്ഥര്‍ പുലര്‍ച്ചെ രണ്ട് മണി വരെയാണ് ഇത്രയും പണം കൈക്കൂലിയായി വാങ്ങിയതെന്ന് വിജിലന്‍സ് സംഘം വ്യക്തമാക്കി. ഇന്നലെ രാവിലെ പത്ത് മണി മുതല്‍ രാത്രി 12 മണി വരെ സര്‍ക്കാരിന് റവന്യൂ വരുമാനമായി ലഭിച്ചത് 69,350 രൂപ മാത്രമാണ്.
വിജിലന്‍സ് സംഘം പരിശോധനക്കെത്തിയതിന് പിന്നാലെ മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ബിനോയ് ഇവിടെ നിന്ന് ഓടി രക്ഷപ്പെടാന്‍ ശ്രമം നടത്തിയിരുന്നു. മറ്റൊരു ഉദ്യോഗസ്ഥന്‍ അടുത്തുള്ള ആശുപത്രിയിലും അഭയം തേടി. ഇവരെ വിജിലന്‍സ് പിന്തുടര്‍ന്ന് പിടികൂടി.
പണം കൂടാതെ അതിര്‍ത്തി കടന്നെത്തുന്ന പച്ചക്കറി, പഴങ്ങള്‍ എന്നിവയും ഉദ്യോഗസ്ഥര്‍ കൈക്കൂലിയായി വാങ്ങാറുണ്ടെന്ന് വിജിലന്‍സ് സംഘം പറയുന്നു.
