തിരുവനന്തപുരം- പോലീസ് സ്‌റ്റേഷനില്‍ എസ്ഡിപിഐ പ്രവര്‍ത്തകനെ ജയ് ശ്രീറാം വിളിപ്പിച്ചെന്ന ആരോപണം പച്ചക്കള്ളമാണെന്ന് മന്ത്രി സജി ചെറിയാന്‍. എസ്ഡിപിഐ യുടെ ആരോപണത്തിന് വിജയ് സാഖറെ മറുപടി നല്‍കിയിട്ടുണ്ടെന്നും മന്ത്രി പറഞ്ഞു.
ആലപ്പുഴ കൊലപാതകങ്ങളില്‍ യഥാര്‍ത്ഥ പ്രതികളെ സംരക്ഷിക്കാന്‍ രണ്ട് സംഘടനകളും ശ്രമിക്കുകയാണ്. പ്രതികളെ കണ്ടെത്തുന്നില്ല എന്നത് ആരോപണം മാത്രമാണ്. കൃത്യമായ രീതിയിലാണ് അന്വേഷണം നടക്കുന്നത്. യഥാര്‍ത്ഥ പ്രതികളെ തിരിച്ചറിഞ്ഞിട്ടുണ്ട്. മാധ്യമങ്ങള്‍ നുണപ്രചരണങ്ങളുടെ പിന്നാലെ പോകരുതെന്നും മന്ത്രി സജി ചെറിയാന്‍ പറഞ്ഞു.
സംസ്ഥാനത്ത് ഭീകര പ്രവര്‍ത്തനം നടത്താനും വര്‍ഗീയ ചേരിതിരിവ് വളര്‍ത്താനുമാണ് ശ്രമം നടക്കുന്നത്. കൊലപാതകങ്ങളില്‍ ഉന്നതതല ഗൂഢാലോചന ഉണ്ടെങ്കില്‍ അന്വേഷിക്കും. സോഷ്യല്‍മീഡിയയിലെ വിദ്വേഷപ്രചരണങ്ങള്‍ക്കെതിരെ കര്‍ശനനടപടികള്‍ സ്വീകരിക്കുമെന്നും മന്ത്രി അറിയിച്ചു.
എച്ച്.സലാം, എ.എം ആരിഫ് എന്നിവര്‍ ഒരു പ്രത്യേക മതത്തില്‍പ്പെട്ടവരായതിനാല്‍ അവര്‍ എസ്ഡിപിഐക്കാരാണെന്ന് പറയുന്നത് വിവരക്കേടാണെന്ന് സജി ചെറിയാന്‍ പറഞ്ഞു. യഥാര്‍ത്ഥ പ്രതികളെ സംരക്ഷിക്കാനാണ് ഇത്തരം ആരോപണങ്ങള്‍ ഉയര്‍ത്തുന്നതെന്നും മന്ത്രി പറഞ്ഞു.
