ഇടുക്കി : ഭർത്താവിനെ കാണാതെ അന്വേഷിച്ചിറങ്ങിയ വീട്ടമ്മ ബൈക്ക് ഇടിച്ച് മരിച്ചു. ഭർത്താവിനെ തൂങ്ങി മരിച്ച നിലയിൽ കണ്ടെത്തി. മൂലമറ്റം രതീഷ് പ്രസ് ഉടമ നീറാണുകുന്നേൽ ചിദംബരത്തിൻെ ഭാര്യ സുജാത( 72)യാണ് ബൈക്കിടിച്ച് മരിച്ചത്. രാവിലെ വീട്ടിൽ നിന്ന് പോയ ഭർത്താവ് ചിദബംരം തിരിച്ചെത്താത്തതിനെ തുടർന്നാണ് ഇന്നലെ രാത്രി സുജാത അന്വേഷിച്ചിറങ്ങിയത്.മൂലമറ്റം ടൗണിന് സമീപം വെച്ച് ചേറാടി സ്വദേശി ദിലു ഓടിച്ച ബൈക്കാണ് സുജാതയെ ഇടിച്ചത്. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
സുജാതക്ക് അപകടം പറ്റിയ വിവരം അറിയിക്കാനായി നാട്ടുകാർ ചിദംബരത്തെ അന്വേഷിച്ച് പോയപ്പോഴാണ് സ്വന്തം പ്രിന്റിംഗ് പ്രസിന് സമീപത്തെ കിണറ്റിലെ പൈപ്പിൽ തൂങ്ങി മരിച്ച നിലയിൽ കണ്ടെത്തിയത്.
