ലഖ്നൗ-പ്രായപൂര്‍ത്തിയാകാത്ത പെണ്‍കുട്ടിയുടെ വയറ്റില്‍ നിന്നും ഡോക്ടര്‍മാര്‍ കണ്ടെത്തിയത് രണ്ട് കിലോയോളം വരുന്ന മുടി. ഉത്തര്‍ പ്രദേശിലെ ബല്‍റാംപൂരിലുള്ള ആശുപത്രിയിലാണ് സംഭവമുണ്ടായത്.
കഴിഞ്ഞ രണ്ട് വര്‍ഷമായി പെണ്‍കുട്ടി ക്ഷീണിച്ച് വരികയായിരുന്നു. അതിനിടെ ഇവര്‍ക്ക് മുടി കൊഴിച്ചിലും ഉണ്ടായിരുന്നതായി ശ്രദ്ധിച്ചിരുന്നു. കഴിഞ്ഞ 10 ദിവസത്തിന് മുന്നെ പെണ്‍കുട്ടിക്ക് കടുത്ത വയറുവേദനയും ഛര്‍ദ്ദിയും അനുഭവപ്പെടുകയായിരുന്നു. ഉടനെ തന്നെ പെണ്‍കുട്ടിയെ ബല്‍റാംപൂര്‍ ആശുപത്രിയിലേക്ക് കൊണ്ടുപോകുകയും ചെയ്തു. ബല്‍റാംപൂര്‍ ആശുപത്രിയിലെ ശസ്ത്രക്രിയാ വിഭാഗത്തിലെ ഡോ. എസ് ആര്‍ സമന്ദര്‍ പരിശോധിക്കുകയും ചെയ്തു. അള്‍ട്രാസൗണ്ട് സ്‌കാനിലൂടെ നടത്തിയ പരിശോധനയില്‍ പെണ്‍കുട്ടിയുടെ വയറ്റില്‍ ഒരു മുഴ കാണപ്പെട്ടു. തുടര്‍ന്ന് സി ടി സ്‌കാന്‍ നടത്തി പരിശോധിച്ചപ്പോളും വലിയ മുഴ കാണുകയായിരുന്നു. തുടര്‍ന്ന് എന്‍ഡോസ്‌കോപ് പരിശോധനയിലാണ് വയറ്റിലുള്ളത് മുടിയാണെന്ന് കണ്ടെത്തിയത്. 20 സെന്റിമീറ്റര്‍ വീതിയില്‍ രണ്ട് കിലോയിലധികം ഭാാരമുള്ളതാണെന്നും മനസ്സിലാക്കി.
രണ്ട് മണിക്കൂറോളം നീണ്ടു നിന്ന ശസ്ത്രക്രിയക്ക് ഒടുവിലാണ് വയറ്റില്‍ നിന്നും മുടി നീക്കിയത്. 17കാരി അപൂര്‍വമായ ട്രൈക്കോബെസോവര്‍ എന്ന രോഗത്താല്‍ ബുദ്ധിമുട്ടുകയായിരുന്നു. രോഗി സ്വന്തം മുടി പറിച്ചെടുത്ത് കഴിക്കുകയായിരുന്നു. ജനിച്ചപ്പോള്‍ മുതല്‍ പെണ്‍കുട്ടിക്കുണ്ടായിരുന്ന മാനസികാസ്വാസ്ഥമാണ് ഇതിന് കാരണമെന്നും ഡോക്ടര്‍മാര്‍ പറയുന്നു.
പെണ്‍കുട്ടി വര്‍ഷങ്ങളോളമായി കഴിച്ച മുടി വയറ്റില്‍ ഒരു കെട്ടായി മാറുകയായിരുന്നു. ഇത് ആമാശയത്തില്‍ നിന്നും ചെറുകുടലിലേക്കുന്ന വഴിയും ഇതോടെ തടസപ്പെട്ടു. ഇതോടെയാണ് ഭക്ഷണം കഴിക്കാന്‍ പെണ്‍കുട്ടിക്ക് ബുദ്ധിമുട്ട് അനുഭവിച്ച് തുടങ്ങിയത്. മുടി കാരണം ഭക്ഷണം ദഹിക്കാതെ കിടിക്കുകയായിരുന്നു. ശസ്ത്രക്രിയയിലൂടെ മാത്രമേ ഇത് ചികിത്സിക്കാന്‍ സാധിക്കു എന്ന് ഡോക്ടര്‍ അറിയിക്കുകയായിരുന്നു. ഇതോടെ 17 കാരിയുടെ ശരീരഭാരം 32 കിലോയിലേക്ക് കുറയുകയും ചെയ്തു.
