ജിദ്ദ - സ്വദേശത്തേക്ക് നാടുകടത്തുന്നതിന് ശുമൈസി ഡീപോര്‍ട്ടേഷന്‍ സെന്ററില്‍നിന്ന് ജിദ്ദ എയര്‍പോര്‍ട്ടിലേക്ക് കൊണ്ടുപോകുന്നതിനിടെ ആഫ്രിക്കന്‍ യുവതിക്ക് ഡീപോര്‍ട്ടേഷന്‍ സെന്റര്‍ ബസില്‍ സുഖപ്രസവം. സുരക്ഷാ വകുപ്പുകള്‍ നടത്തിയ റെയ്ഡിനിടെ പിടിയിലായ 31 കാരിക്ക് എയര്‍പോര്‍ട്ട് യാത്രക്കിടെ ബസില്‍ പ്രസവവേദന ആരംഭിക്കുകയായിരുന്നു. എയര്‍പോര്‍ട്ടിലെത്താറായപ്പോഴേക്കും യുവതിക്ക് പ്രസവവേദന കലശലായി.
കിംഗ് അബ്ദുല്‍ അസീസ് ഇന്റര്‍നാഷണല്‍ എയര്‍പോര്‍ട്ട് ഡീപോര്‍ട്ടേഷന്‍ ടെര്‍മിനലിലെ ഹെല്‍ത്ത് സെന്ററില്‍നിന്നുള്ള മെഡിക്കല്‍ സംഘത്തിന്റെ പരിചരണത്തില്‍ ബസില്‍ യുവതി ആണ്‍കുഞ്ഞിന് ജന്മം നല്‍കി. ഹെല്‍ത്ത് സെന്ററിലേക്ക് മാറ്റുന്നതിന് സാഹചര്യം അനുകൂലമല്ലാത്തതിനാലാണ് ബസില്‍ തന്നെ മെഡിക്കല്‍ സംഘം പ്രസവത്തിന് സൗകര്യം ഒരുക്കിയത്. യുവതിയെയും കുഞ്ഞിനെയും പിന്നീട് വിദഗ്ധ പരിചരണത്തിനും പരിശോധനക്കുമായി ആംബുലന്‍സില്‍ മുസാഅദിയ മെറ്റേണിറ്റി ആന്റ് ചില്‍ഡ്രന്‍സ് ആശുപത്രിയിലേക്ക് നീക്കി.
