ദമാം - കെ. സുധാകരൻ എം.പി കെ.പി.സി.സി പ്രസിഡന്റായി ചുമതല ഏറ്റെടുക്കുന്ന ചടങ്ങ് തത്സമയം വീക്ഷിക്കുവാൻ സൗകര്യമൊരുക്കിയും മധുര വിതരണം നടത്തിയും ഒ.ഐ.സി.സി ദമാം റീജണൽ കമ്മിറ്റി പ്രവർത്തകർ ആഹ്ലാദം പങ്കുവച്ചു. തിരുവനന്തപുരത്തെ ഇന്ദിരാഭവനിൽ നടന്ന ചടങ്ങുകൾ തത്സമയം കോവിഡ് മുൻകരുതൽ മാനദണ്ഡ നിബന്ധനകളോടെ ഒരുമിച്ചിരുന്ന് കാണുവാൻ അതിരാവിലെ തന്നെ ഒ.ഐ.സി.സി നേതാക്കൾ ദമാം ബദർ അൽറാബി ഓഡിറ്റോറിയത്തിൽ എത്തിച്ചേർന്നു. പ്രതിപക്ഷ നേതാവ് വി.ഡി സതീശന്റെയും മുൻ പ്രതിപക്ഷ നേതാവ് രമേശ് ചെന്നിത്തലയുടെയും, കെ.പി.സി.സി പ്രസിഡന്റായി ചുമതല ഏറ്റെടുത്ത കെ. സുധാകരന്റെയും പ്രസംഗങ്ങളുടെ ചില ഭാഗങ്ങൾ പരിസരം മറന്ന് നിറഞ്ഞ കരഘോഷത്തോടെയാണ് ദമാമിലെ ഒ.ഐ.സി.സി നേതാക്കൾ ശ്രവിച്ചത്.
ദമാമിൽ നടന്ന പരിപാടികൾ ആക്ടിംഗ് പ്രസിഡന്റ് ഹനീഫ് റാവുത്തർ ഉദ്ഘാടനം ചെയ്തു. കെ. സുധാകരൻ ചുമതല ഏറ്റെടുത്തതോടെ കോൺഗ്രസ് പ്രവർത്തകർക്കിടയിൽ പുത്തനുണർവ് ഉണ്ടായതായും, ചിട്ടയായ പ്രവർത്തനത്തിലൂടെ സമയബന്ധിതമായി ബൂത്ത് തലം മുതൽ പ്രവർത്തകരെ പ്രവർത്തന സജ്ജമാക്കുവാൻ കെ.പി.സി.സിയുടെ പുതിയ പ്രസിഡന്റിന് സാധിക്കുമെന്നും ഹനീഫ് റാവുത്തർ പറഞ്ഞു. കെ സുധാകരനെ എത്രത്തോളം ഭയപ്പെടുന്നു എന്നതിന്റെ തെളിവാണ് സുധാകരനെതിരെ സി.പി.എം സെക്രട്ടറിയേറ്റ് പുറത്തിറക്കിയ ബി.ജെ.പി ബാന്ധവ ആരോപണമെന്ന് സംഘടനാ ചുമതലയുള്ള ജനറൽ സെക്രട്ടറി ഇ.കെ സലിം പറഞ്ഞു. മുൻ പ്രതിപക്ഷ നേതാവ് രമേശ് ചെന്നിത്തലക്കെതിരെ ബി.ജെ.പി ബാന്ധവ ആരോപിച്ച് ന്യൂനപക്ഷങ്ങളെ തെറ്റിദ്ധരിപ്പിക്കുവാൻ സാധിച്ചുവെന്നതിന്റെ മുൻ അനുഭവ പശ്ചാത്തലത്തിലാണ് കെ. സുധാകരനെതിരെയും സി.പി.എം ആസൂത്രിതമായ ഈ നീക്കം നടത്തിയത്. എന്നാൽ ഈ കുതന്ത്രം ഇനി വിലപ്പോകില്ലെന്നും, ന്യൂനപക്ഷങ്ങൾക്ക് കെ. സുധാകരനെന്ന നേതാവിനെക്കുറിച്ച് വലിയ മതിപ്പാണെന്നും ഇ.കെ സലിം വ്യക്തമാക്കി.
മലപ്പുറം ജില്ലാ കമ്മിറ്റി പ്രസിഡന്റ് അബ്ദുൽ ഗഫൂർ വണ്ടൂർ, പത്തനംതിട്ട ജില്ലാ പ്രസിഡന്റ് തോമസ് തൈപ്പറമ്പിൽ, ആലപ്പുഴ ജില്ലാ പ്രസിഡന്റ് നിസ്സാർ മാന്നാർ, കോഴിക്കോട് ജില്ലാ ജനറൽ സെക്രട്ടറി അസ്ലം ഫറോക്ക്, മലപ്പുറം ജില്ലാ ജനറൽ സെക്രട്ടറി ഹമീദ് മരക്കാശ്ശേരി എന്നിവർ ബദർ അൽറാബി പരിസരത്തും കടകളിലും മധുരവിതരണം നടത്തുവാൻ നേതൃത്വം നൽകി. ഒ.ഐ.സി.സി യൂത്ത് വിംഗ് അൽഹസ ഏരിയ കമ്മിറ്റിയുടെ നേതൃത്വത്തിലും കേക്ക് മുറിച്ച് ആഹ്ലാദം പങ്കുവച്ചു. യൂത്ത് വിംഗ് നേതാക്കളായ ഫൈസൽ വാച്ചാക്കൽ, അർഷദ് ദേശമംഗലം, അബ്ദുൽ റഷീദ് വരവൂർ, നിസാം വടക്കേകോണം തുടങ്ങിയവരാണ് അൽ ഹസയിലെ പരിപാടികൾക്ക് നേതൃത്വം നൽകിയത്.
